Registers van de Hollandse grafelijkheid 1299-1345

A tous chiaus qui ces presentes lettres v[er]ront u oront, nous Florens Bertaus^b, chevaliers, salut et cognissance de veritet. S[avoir] faisons a tous ke comme pour le vendage ke nous pour nous, nos hoirs et nos successeurs fesimes a haut prinche et po[issant, no] cher et amei signeur Guillaume, conte de Haynnau^c et de Hollande, pour luy, ses hoirs et ses successeurs de tout chou [ki nous es]key^d u eskeir peuwist entirement de no cher neveut Gillion Bertaud^e, cuy Dieus absoille, en le ville de Maslignes, en toute l[e frankise et] es appartenanches et appendanches de le ditte ville, et de toutes les villes appartenans et appendans^f a ycelle, sil est ass[a]voir le[s villes] d[e] Neckerpoele, de Nuwenlande, de Heyde, de Musen, de Hever, de Hombeke, de Leest et de Effen^g, et de toutes les appartena[c]h[es et appen]danches appartenans et appendans as ditt[e]s villes, les quelles sont de le frankise de le ditte ville de Maslignes, en quelconkes ma[niere] ke che soit, [soi]t [en] terres, en maisons, [en forte]reches, en preis, en yauwes, en winages, en rentes, en bos, en dro[it]ures, [en siers], en bans, en signe[rie], en justice haute et basse, en hommages, en tenaules et en quelconkes autre maniere k[e] che soit, [quil puist iestre] dit u nommet, hors mis [c]hou qui nous eskay de le mor[t] Gillion Bertaut^h, nostre oncle, et de le demiselle de Breeda, [nostre suer], nos chers sires li cuens dessus dis [nou]s deuist et euwist [en]conven[t] a assenner XXIII^C lb. de terre au Tournoisⁱ, le gros [Tournois le roy de] France de vray pois et de loy comptet pour XVI d. Tournois^j, sil [e]st assavoir deus mille livrees de [t]erre en se contet de [Haynnau] et III^C lb. de terre en ses cont[és d]e Hollande et de Zeellande, [en]si quil est plus plainnement contenut es lettres sur che faites. Nous, par bonne deliberation et bon conseil e[u]t sur chou, nous sommes [aviseit et con]cordeit de le ditte assenne envers no cher signeur le conte dessus dit en le maniere quil s[en]suit: cest assavoir ke [nos dis sires] li cuens nous delivre desmaintenant, et nous remet^k en no main, et nous le rechevons de luy le ditte ville^l de [M]asling[n]es, [les appen]danches et les appartenances de le ditte ville et tout [c]hou ke deseure est escript, quil accacta a nous, en[t]irement a tenir de luy et [de ses] hoir[s, se] de luy deffaloit, les humuers et les pourfis des coses dessus d[it]tes, tout le cours de no vie, sil nen reportoit pour [no]us [u] a no vie de[s]eure ditte lommage a haut prince poissant, no cher et amei signeur le duc de Braibant; et se il le [r]eportoit, nous [en de]veriens a [n]o cher signeur le duc dessus dit hom en le fourme et en le maniere ke dit est. [Et de chou] dont nos dis sires li cue[ns est homme lev]eske de Liege, pour locquison dou dit accat quil a [fait a] nous, de[m]orro[n]s n[ous en] lommage de no dit signeur le [conte] et toudis, sans fraude et sa[ns] male[ngien. Apres le dec]ies d[e n]ou[s], ne porons, ne deverons no [ho]ir ne nostre successeu[r] riens clamer a le ditte ville, [et] a to[u]t chou qu[oi ke se soit] ke nous avons repris en no mai[n] de no di[t] signeur le conte, ne a [cose] ki y acroisse ne ki y sourv[i]engne par sucception^m [u par sen] pourcach, soit en hiretage u autrement, ke tout entirement ne doive [retour]nerⁿ et revenir au dit signeur le conte [u a ses] hoirs com [ses] dro[is] hiretages. [N]e ne d[ev]ons ne poons amenrir, enwagi[er] u aleuwer le ditte ville, ^o appartenanches u appe[ndances], ne cose ki deseure soit escripte, qui soit u ait est[ei] del accat de le ditte ville; e[t] se nous le faisiens, si sont et soront no [hoir et no] successeur tenut, sans aler encontre, dou delivrer et dou restaulir. Et parmy les [co]nvenences dessus dittes nous pour [nous, nos] hoirs et nos successeurs a[vons] quittet, quittons et clamons quitte bien et loyalment no dit sig[neur l]e conte, ses hoirs, [ses successeurs] et tous ses pleges et cascun dyaulz dou dit assennement des dittes XXIII^C lb. de terre, dont il estoit oblegies envers no[us et quil] n[o]us devoit faire pour laccat devant dit, et nous en tenons assolz et apaij[et] pour nous, nos hoirs et nos successeurs a tous jours perpet[u]elment; et renonchons et avons renonchiet especialment et generalment pour nous, nos hoirs et nos successeurs a [to]utes forches et a toute vertu de lettres, de quelconkes teneur quelles soient, par les quelles nous, no hoir u no su[cc]esseur poriens no dit signeur le conte, ses hoirs, ses successeurs et ses pleges constraindre ne travellier pour le cause del assenne de l[e terr]e devant ditte. [Et] sil avenoit en temps [a v]enir ke no dis sires li cuens a no vivant nous volsist faire loyal assennement des dittes [XXIII^C] livrees de [terre] au Tournois^p en ses con[té]s, si com dessus est dit, nous sans nul contredit, debat ne calenge luy rendriens le ditte ville et [toutes] l[e]s apparten[a]nches [et] appendanches deseure nommees, ensi comme nous lavons recheut de luy, avoec [t]outes le[s] esk[eances qui es]kauiwes i seroient a no vivant, tantost ke nous seriens souffissaument assenet del assenne dessu[s] d[it]te, [sans] nul b[ar]at [n]e [cavillation. Et sil es]toit ensi ke a[pres] no dec[es], en le premiere anee ^q ke nous seriens tr[esp]asset de cest siecle, nos drois hoirs fes[ist loyal] sairement k[e, pour] luy a tenir et ses dr[o]is hoirs apre[s] luy, il vulsist le ditte ville et toutes les ap[pen]danches et appartenanches appendans et a[ppar]tenans a icelle, si comme dessus est dit, si ^r comme li vendages dessus dis sestent, raccatter et rajoindre a luy, f[aire] le [p]uet [et] doit pour XXIII^M lb. de Tournois^s de le monnoie dessus ditte; et celi argent paiera il dedens le ditte anee au dit conte u a ses hoirs a une fie, sa[ns m]alengien, en ses villes de Mons en Haynnau^t u de Dourdrech, en le quelle quil amera ^u, a ses cous, a ses frais et en sen peril. Et se nos dis hoirs na paijet dedens^v le ditte ane[e] largent entirement, si comme devant est dit, il^w si ho[ir] ne si successeur ne poront ne deveront jamais revenir a le ditte ville ne au raccat del accat devant dit ne al hiretage, ai[ns] demo[r]ra perpetuelment et paisivlement au dit conte, a ses hoirs et a ses successeurs comme ses drois et ses bons hiretages, sans avoi[r j]amais caleng[e sou]r cho[u] ne content de nos hoirs, de nos successeurs ne dautruy de par yaulz. Et tout chou ke chi dess[u]s est escript de [poi]nt en point cognissons nous^x et tiesmoingnons; et a chou fermement tenir, sans aler encontre, obligons nous et avons [obligiet n]ous, nos hoirs et nos successeurs nos biens et les leur entirement, u quil soient trouvet.

Et avons en cognissance [de veritei ce]s lettres sayelees de no sayel, et prions nobles hommes nos ameis cousins Jehan^y, signeur de Barlaer, et Henry, [signeur de D]uffel, chevaliers, quil voellent en cognissance de coses dessus dittes ces presentes lettres saiel[er] avoe[c] nous. Et nous [Jehans de Baer]laer, sires de Hellemont, et Henrys, sires de Duffel, chevalier, a le priere de noble homme no cher et amei cousin monsigneur [Florent Bertau]d dessus dit, signeur de Maslingnes, avons ces presentes lettres sayelees de nos sayaulz avoec le sien. Qui fu[re]nt [faites et donn]ees en lan de Grace mil trois^C et dissewit, le venredy devant lAssention, vint et chuinck^z jour ou mois [de may].