Registers van de Hollandse grafelijkheid 1299-1345

Graaf Willem III regelt het dijkonderhoud en afwatering in West-Friesland.

Dat Melme en Leye toponiemen zijn, blijkt uit een aanhaling in MNW s.v.

melm.

Wi Willaem^a grave van Heynnegouwen^b etc. maken cont etc. Want onse land van Vriesland^c langhe tijd suaerlike^d ende oneffen ^e langhe tijd ghedijct^f hevet gheweest ende qualiken ghewaterd, so sien wi over een ghedraghen met onsen ghemenen Rade met goeder voirsienichede hoe wi willen dat men voirdane^g Vriesland^h dike ende watere.

In den eersten zullen dieⁱ van Drechterland den dijc maken van Werfaerds hove tote Walichs dike, ende al Walichs dike tote Outerleker dike^j toe, ende dien houden met allen horen ghemenen ambochte.

Voird zullen die van Oterleke houden al dien dijc tuschen Walichs dijc^k ende Heren Hughen dijc^l; ende dair toe gheven wi hem te hulpe sonder coept dat melmekijn dat si coepen wilden an Oterleke, also alst hem die rentemeister bewisen zal.

Voird sullen die van Scaghen ende van Niedorp houden in Heren^m Hughen dijc vier hondert roeden dijcs, bi der roede van Haerlem te meten, ende die zullen si nemen an die van Oterleke.

Voird sullen die van Gheestman ambocht Herenⁿ Hughen dijc voirt houden ende al den dijc tote den Kenemair^o dijc toe bi der poirte van Alkemare^p, ende den dijc van den Rekerdam tote Vriesen dike^q toe diemen hiet Nyewescagherdijc^r.

Voird Vriesen dijc diemen hiet Scagher dijc^s zullen houden die ghene diene sculdich sien te houden.

Voird sullen die van Scaghen ende van Niedorp den dijc houden van den oestende van Vriesen dijc^t tote bi des Rentemeisters sluse^u in Heren coech^v, dair sine van outs plaghen toe te houden.

Voird sullen dat ghemene ambocht van Hocwoude met Hensbroke^w ende met Updam ende met^x Aelbrechts^y Florijs^z soens land den dijc houden van des Rentemeesters sluse^a' voirs. toet heren^b' Hughen coeghe. Ende den middeldijc van Heren^c' Hughen coeghe tote Werfaerds hove toe segghen wi quite datten niemant scouwen noch stoelen en sal, ende Hensbroke^d' ende Updam, Melme ende Leye te setten in lichten hoefslach^e' bi Janne van Polanen, bi^f' onsen rentemeister ende onsen dijcgrave, ende niet meer dijcs dair of tontfane dan hem onse lude voirscreven up setten zullen. Ende diemen dijc ofset in Heren^g' Hughen coech, die salmen dijc toe setten Heren coech^h' bi onsen luden voirs.

Voird sal men den Rekerdijc maken anderhalve roede breet ende ene halve^i' roede hoech boven den slechten weghe, bi den dijc grave ende bi den hiemraet, ende dair tenden te scouwen die scoute mit den scepen.

Voird sullen die van Gheestman ambocht enen waterganc hebben doir dat nieweland^j' ende tote Rochsvliet uyt te wateren. Dien waterganc ende waterscuttinghe ane beiden siden sal scouwen onse dijcgrave mitten hiemraet ^k'. Ende die waterscutinghe sal hoghe wesen ten minsten achte roede^l' voeten hoech ende roeden breet up den hoghesten cant, ende die te meersen bi den hiemraet als hem orbaer denket. Ende so wat boeten dair of verscinen zullen, dair of zullen wi hebben die ene helfte ende hair Jan van Heynnegouwen^m' onse broeder die ander helfte, behouden ons onser scouwe ende boete up die zeedijc ende in die slusen.

Voird sal men dat gat up Walichsdorp^n' ende alle die gate die up den Ward^o' wateren toe slaen.

Voird sal men up breken alle die slusen die legghen in Heren^p' Hughen dijc^q' ende in Outerpardijc^r'.

Voird alst ons orbare denket jof dienwiet bevelen soe sal men die sluse te Nuwen doren^s' up breken, ende men sal den zeedijc onder thuys legghen, dair nu die indijc gaet, ende den anderen dijc laten varen; ende in den dijc onder thuys salmen ene sluse legghen.

Voird salmen Heren^t' Hughen waird wateren mit drien ganghen, elc vier voete wijt; des sel een gat gaen doir Scaghen ende een gat in die Wisene ende dat derde gat in Gheestman ambocht, mar dat gat in Gheestman ambocht zalmen wider maken dan vier voete^u' als men waent dattet oirbair es.

Ende omme dat wi alle stucken voirscreven ghestade willen hebben houden^v' ende onverbreckelic behouden ons onser heerlicheden ende ons ghemeents lands orbair^w', zo hebben wi desen brief bezeghelt open met onsen zeghele. Ghedaen in die Haghe up sinte Jacobs dach int jaer ons Heren^x' M^o CCC^o ses ende twintich.