Registers van de Hollandse grafelijkheid 1299-1345

Graaf Willem III en Jacob bisschop van Zuden stellen het bedrag dat de gemene poort van Staveren moet betalen in verband met de zoen tussen het gemene land van Westergo en de graaf op 1500 pond Engels, te betalen in drie termijnen.

Vgl. de hiermee samenhangende oorkonden in het register, nrs. FR 104 en 106.

Wi Willaem^a grave van Heynnegouwen^b, van Holland, van Zeelland ende here van Vriesland^c, ende Jacob bi der ghenade Goids biscop van Zuden, maken cond allen luden. Want die ghemeene poirte van Staveren^d alse van der broeke die die grietmanne ende dat ghemeene land van Westergoe^e jeghens ons, den grave voirs., mesdaen hadden binnen Staveren^f, dair si jeghens ons of versoent sijn, ons gheloeft hevet mid haren^g opene brieve vor dat ghemeene land van Westergoe^h onser vreende huse, die verdreven waren, weder te makene alsoe goet als si waren, bi zegghen des biscops van Zuden, des abts van Staverenⁱ, des lezemeisters van Boedelswairde ende heren Pieters des dekens van Mairden, ende voirt onse segghen te houden tuschen dusent marc ende twie dusent marc Enghelche, die marc over viertich groter Tornoisen^j gherekend; soe segghen wi dat si ons gheven sullen voir die broeke die die van Westergoe^k binnen Staveren^l deden vijftien^m hondert marc Enghelche, te betalen een dordendeil te Paesken naist comendeⁿ, een dordendeil dair nae te Bamisse^o ende dat leste dordendeil dair nae te Paesken^p naist comende^q.

In orkonde desen brieve bezegheld mid onsen zeghelen. Ghegheven tote sinte^r Gheerden berghe des satersdaghes voir sente Jacobs dach int jaer ons Heren dusent drie hondert acht ende twintich.