Reinoud II, zoon van de graaf van Gelre, verklaart dat hij graaf Willem III zal bijstaan tegen iedereen, inclusief de graaf van Vlaanderen wanneer die Willems landen zou aanvallen, maar dat dit niet geldt in geval van een aanval van Willem op Vlaanderen, en dat wanneer hij Willem te hulp komt deze zijn troepen zal voorzien van proviand; dit verbond zal duren zo lang zij beiden leven.
Verbant des graven van Ghelre mitten grave van Hollant.
Boven de tekst, door de schrijfhand: Tghele pappier.
Wi Reynoud, sone des grave van Ghelre, maken cond allen luden dat wi omme nutscip ende oirbair ons ghemeens lands ende om machscape ende vrienscipe willea bi onsen ghemenenb Rade over een ghedraghen sien ende ons hebben verbonden bi onsen ede ende bi onser trouwenc mit onsen lieven neve heren Willaemd, grave van Heynnegouwene etc., ende gheloft witteliken hem f te helpen ende te sterkeng, ende sijn land helpen te houden ende te verwaren ende sijn beste te doene ende te verweren, heymelike ende openbare, jeghens elken man. Ende wair dat sake dat die grave onse neve voirs. onser hulpe begheerde om sijn land te verweren ende te behouden, jeghens wien dat wair binnnen sinen lande jof, behoefde hire, buten sinen lande, so souden wi hem te hulpe comen mit also vele lude als hi begherde, sonder arghenlist; ende alle onse lude die wi mit ons brochten in siere hulpen ende wi sculdich waren te leveren, die soude die grave voirs. leveren jof doen leveren van eten, van drinken ende van spisen, in alre manieren alse wise selve leveren souden jof wise in ons selfs dienste gheleyd hadden. Voirt es te verstane, wair dat die grave van Vlaendre jof sine kindere jof arfnamen sin land erghent anesteken ofte versoeken wilden, zo souden wi den grave onsen neve voirs. te hulpe comen om sine lande helpen te verwaren mit also vele lude als hi begherde, sonder arghenlist; ende dien luden soude hi leveren jof leveren doen in alsulker manieren alse voirs. es ende wise selve leveren souden ende sculdich waren te leveren in ons selfs dienste. Mair wair dat sake dat hi mit sinen luden versoeken wilde die gravescip ende dat land van Vlaendren, so soude hi ons van dier hulpe verdraghen mit onsen luden, mair wi souden altoes dair in pinen dat beste te doen ende die stucken te goede te brenghen; mair alle ghene die hi mochte bidden in siere hulpe op der gravescip van Vlaendren te varen uter gravescip van Ghelre van onsen luden, des souden wi ons wel ghenoeghen laten, ende onsen luden ontrumen dat si sonder moynesse ende alrande lette comen mochten tote hem in siere hulpe. Dese stucken ende dit verbant in allen manieren als si voirscreven sien hebben wi mallic anderen beloft ende ghesekert bi onsen eden ende bi onser trouwen wittelike enede trouwelijc te houden also langhe als wi beydeghader leven sullen, behouden alsulker zekeringhen jof beloften die wi malic anderen hier te voren gheloft en ghedaen hebben; ende willen dat alsulke brieve als wi hier te voren malic anderen ghegheven hebben, ende oec dese brief mede, vast ende ghestade bliven in al har macht. Ende wair dat sake dat onser enich dit verbrake in enighen van desen pointen voirscreven, zo kenneden wi ons selven die ghene die brokich ware dair in witteloes ende trouweloes ende menedich; ende alle dese stucken voirs. sonder alrande archeyt te bliven.
In orkonde etc. Ghedaen ende ghegheven toit Utrechth des vridaghes na Paesdach int jaer ons Heren M CCC twe ende twintich.