Registers van de Hollandse grafelijkheid 1299-1345

Graaf Willem III schenkt heer Willem de bastaard, ridder, zoon van graaf Floris V, de woning met bijbehorend land die eertijds van Pieter van Rolland waren, alsmede een jaarrente van 40 pond Hollands, waarmee eerdere schulden van hem jegens Willem verrekend zijn.

Vgl. nr. KE 92.

Wi Willaem^a grave van Heynnegouwen^b etc. maken cond allen luden dat wi ghegheven hebben ende gheven heren Willaem^c den bastaird, ridder, onsen neve, sgraven Florijs^d sone, toit sinen live die woninghe die Pieters van Rolland was ende al dat land dair die woninghe op^e staet, van den utersten groeten weghe streckende ten dunen waird, die ons ane storven es van Arnoud den Wilden, wilke woninghe voirscreven wi hem hier voirmaels voir XIII lb. sjaers ghegheven hadden in minderinghe ende in ofslaghe van alsulken renten als wi hem voir die tijd ghegheven hadden. Voirt hebben wi heren Willaem^f onsen neve voirs. ghegheven ende gheven XL lb. Hollands^g sjaers toit sinen live, die wilke wi hem bewisen jaerlix intenemen ane Enghebrecht^h onsen rentemeester van Noirthollandⁱ, of ane den ghenen die in dier toe comender tijd aldair rentemeester wesen zal, jaerlix intenemen ende te betailen die ene helft te Voirscoter market ende die ander helfte toit sente Martijns^j daghe in den winter^k dair na naist comende; wair omme wi ombieden ende ghebieden Enghebrecht^l onsen rentemeester, jof denghenen die in der toe comender tijd rentemeester al dair wesen zal, dat si heren Willaeme^m voirscreven sonder enich meer ghebot van ons te hebben jaerlix betailen ende uytreken jaerlix also langhe als hi levet ten termine voirscreven dese voirs. XL lb. Hollandsⁿ sjaers, ende dair of van hem te nemen letteren van quitancien voir ons mede te rekenen. Ende mid desen voirsproken bewisinghe alse van XIII lb. ende XL lb. voirscreven zo sullen wi quite wesen van alre ghifte, beloifte ende bewisinghe die wi heren Willaem^o voirs. voir dese tijd mit brieven of anders, in wilker manieren dat wesen moghe, ghegheven, beloift of bewijst hebben, sonder allen arghenlist.

In oirkonde etc. Ghegheven toit Berghen in Heynnegouwen^p des vridaghes naer Pinxter dach int jaer ons Heren M CCC neghen ende twintich.