Registers van de Hollandse grafelijkheid 1299-1345

Graaf Willem III bekleedt Jan van Sassenheim, knaap, met het schoutambacht van Haarlem, waarvoor deze jaarlijks 20 pond Hollands zal ontvangen alsmede 10 pond Hollands voor iedere doodslag berecht in zijn ressort; voorts schenkt hij Jan de korentiende te Schoten.

Willaem ..grave van Heynnegouwen^b, van Holland^c ende here van Vriesland^d maken cond allen luden dat wi bevolen hebben ende bevelen voir ons ende voir onse nacomelinghe Janne van Zassenem^e, onsen trouwen knape, also langhe als hi levet onse scoutambocht van Hairlem binnen onser vryhede van onser porte voirs. te bedriven ende te verwaren van onser weghen tote onser eren ende tot onser oirbare, ende van allen zaken dair binnen rechter te wesen dat men met scepen van Hairlem bedinghet of scoudich es te bedinghene; ende wi jof onse bailiu van Kenemairland^f ende van Vriesland sullen jairlix die scepenen van Hairlem verniewen ende andere scepene zetten bi sinen rade ende bi sinen goeddencken. Ende van desen voirscreven scoutambocht te bedriven zel Jan voirs. ons of den ghenen dien wijt bevelen sullen alle jare goede rekeninghe doen; ende wi sullen Janne voirs. jairlix gheven omme dit voirseyde scoutambocht bedriven ende te verwaren twintich pond Hollands^g. Voert so sel Jan voirscreven hebben van elken doytslaghe die ghevallet binnen der vryhede van Hairlem die scepen bedinghen jof sculdich sien te bedinghen, ende ghesoent wort, tien pond Hollands^h. Voirt soe gheven wi Janne van Zassenemⁱ voirscreven also langhe als hi levet onsen coeren tiende ligghende te Scoten, ende Enghebrechts van Scoten was, also groet ende also cleyn als hi ons ane verstarf van onser liever nichten der vrouwen van Voirne, dair God die ziele of hebben moet. Ende alle voirscreven poynten sel Jan voirs. rustelike ghebruken also langhe als hi levet; ende wilken tyden dat Jan voirs. ende van live te dode coemt, zoe sel dat voirseyde scoutambocht ende tiende weder an ons ende an onse nacomelinghe comen los ende ledich; ende alle dinghe sonder arghelist.

Ghegheven des saterdaghes na onser Vrouwen dach half oichste int jair ons Heren M^o CCC^o ses ende dortich.