Registers van de Hollandse grafelijkheid 1299-1345

Graaf Willem III verleent Beatrijs, weduwe van Jan de Keizer, een aantal goederen te Schiedam en in Riederwaard als lijftocht, waaronder te Schiedam de huizen Keizerrijk en Weeldenburg en de overtoom en windas aldaar, onder bepaalde voorwaarden.

Vgl. nrs. NH 366, 367 en 370.

Wi Willaem^a grave etc. maken cond etc. Want Beatrichen^b Jans Keysers ^c wijf was, dair God die siele af hebben moete, ons quite ghesconden heeft van allen eische die si ons eisken mochte ende si ons vrilike ^d op ghedraghen heeft dat huys te Sciedame^e dat Keiserrike^f heet ende die overtocht, soe hebben wi hore dat voirseyde huus ende overtocht weder verliet ende verlien te hare lijftucht; voird soe verlien wi hore te hare lijftucht viertich morghen lands van onse twie ende tachtich morghen lands die wi legghende hebben in Riederwaird^g in dat Roedenche^h veldⁱ noirdward van der groter scure, ende die grote scure ende alle die woninghe die binnen der graften staen, ende onse steenhuus te Sciedamme dat Weeldenburch heet metter scure after over der graft, ende ghewisselt waren jeghens Jan den Keyser voirs. omme dat gasthuus te Sciedamme, dair^j si hoir lijftucht ane hebben^k, ende dat wijndaes te Sciedamme. Ende dese voirseyde husinghe, land, overtocht ende wijndaes hebben wi hore verliet tote^l hore lijftucht ende ghelovense dair^m in te houdene alse wi sculdich sien te doene na sede ende woente van onsen lande, in manieren dat si ons van den huse te Weeldenbuchⁿ alsoe langhe als si levet alsulken dienst doen sal alse men ons sculdich was te doene van den huze dat nu tgasthuus es, ende dat si ons van den windase alle dinghen diemen met windase pleghet over te doene ende op te done ende ons ende der gravinnen ende onser herberghen toe behoeren over sal doen werken, sonder onsen cost jof onser nacomelinghen graven van Holland^o.

In oirkonde desen brieve bezeghelt met onsen zeghele^p. Ghegheven in die Haghe des woensdaghes voir Pinxter int jair ons Heren M^o CCC^o acht ende twintich^q.