Registers van de Hollandse grafelijkheid 1299-1345

Graaf Willem III beveelt de baljuw van Rijnland om bij de dood van de burggraaf van Leiden beslag te leggen op de heerschappij, het ambacht en de lenen die behoren tot het burggraafschap van Leiden en ervoor te zorgen dat vrouw Justine, burggravin van Leiden, gehandhaafd blijft in haar lijftocht en in de helft van de nagelaten goederen van de burggraaf.

Vgl. nrs. NH 622, 623, 628, 630 en 631.

Willaem^a ..grave^b van Heynnegouwen^c, van Holland^d ende here van Vriesland ombieden u heren Janne^e van Polanen, onsen bailiu van Rijnland, jof soe wie op die tijd bailiu in Rijnland es, soe wilke tijd des burchgraven van Leyden ghebreect ende van live te doede coemt dat ghi van onsen weghen ju hand slaet ane al die heerscippie ende ambochten ende liene datter burchgravescip van Leyden toe behoirt, ende dat ghi den ghenen dien wi ende die burchgrave van Leyden bevolen hebben sijn ambocht ende zine heerlichede ende sijn goed te bedriven hout van onser weghen ende tot onser behoef in al den goede voirscreven dair die burchgrave in ghezeten hevet tote ^f deser tijd toe ende besitten sal tot ziere doot toe, ter tijd toe dat ons yemend mid scoenre redene betoghet dat hier beter recht toe hevet, ende dien willen wi doen dat wi sculdich sien te doene; voirt dat ghi veren Justinen, der burchgravinnen, hout in al hore lijftochte die hoir die burchgrave voirs. mid onser hant ghemaict hevet ende wi bezeghelt hebben, ende dat^g ghise hout in half den eygheliken goede dat die burchgrave laten sal na ziere doet boven der scout die hi sculdich es ende kenliken es na den rechte van den lande, het en ware dat mense mid enen rechte dair uyt wonne. Ende woude ju hier in yemend wederstaen, soe ombieden wie u dat ghi vermaent onse bailiuwe ommetrend^h u ghezeten, onse wel gheboeren lude, porteren ende ghemeenten, dat si ju dair in also sterken van onsen weghen dat ghijs vryliken ghebruken moghet; ende ombieden hem allen dien ghire toe vermaent dat si u also helpen ende starken also lief als zi ons hebben in desen dinghen, dat ghijs ju mid redene beloeven moghet. Ende wair yement die ju hinderde jof wederstonde, dat souden wi houden ane sijn lijf ende ane sijn goet.

Ghegheven tote Sinteⁱ Gheerden berghe^j up sinte Matheus avonde int jair ons Heren M^o CCC^o ses ende dortich.