Registers van de Hollandse grafelijkheid 1299-1345

Graaf Willem IV, die op Noord-Beveland twee inlaagdijken heeft laten leggen aan de Zuidvliet bij Kortgene, bepaalt dat die door alle ingelanden onderhouden moeten worden met met gelijk, en dat de schouw ervan zal worden verricht door dijkgraaf en gezworenen.

De bovenstaande datering is gebaseerd op de veronderstelling dat de paasstijl is toegepast. Zie de Inleiding.

Het in de tekst genoemde stadel is te verstaan als de dijkstal, de grond waarop de dijk ligt (MNW, s.v. 'stael' en 'dijcstal').

Willaem ..grave van Heynnegouwen^a etc. maken cond allen luden dat wi omme ^b noet ende vrese van der dijckaedsen in Noirtbeveland op Zuutvliet hebben doen legghen twie inzeten, ene^c op die westzide^d van Cortekene int Zuutambocht^e van Wissenkercke^f ende die ander opdie oestzide van Cortekene in sherWitten kinder ambocht in die prochye van Emelisse, in manieren dattet ghemene land van Nortbeveland, est gheestelic est wairlic, est edel est onedel, poirteren jof ghemeenten, met ^g ghelike van horen lande die insete maken zullen in delinghe van den stadel, in dier inseten beneden^h IIII roeden wijt, X voete hoech bi der roeden ende X voete breet op sinen cante, ende op beyden zijden toe legghende goed dijcscape, ende dien te scouwen bi onsen dijcgraven ende sinen ghesworen, ende dien te bedriven ende op te nemen; ende dair tenden sallen maken ende houden dat arve des die dijckaedse es also groet als hem die dijcgrave ende die gheswoerne scieren sullen, ende datter tland bi versekert blive. Ende wair enich land in Beveland dat sinen cost hier niet toe en dede, dair soude onse dijcgrave met sinen gheswoerne onse ghelt in legghen, ende dat weder in riden alse recht es van dijckaedsen. Ende want ghene costume gheweest en hevet in Nortbevelant dattet ghemene land enighe in sete becost hevet voir dese tijt, ende ment nu van node doen moet, soe salt vort ane een rechtⁱ in den lande van Noirtbeveland bliven; want sijs van alle an ons ghebleven sijn tlands oirbair te doene, datmen alle in zete die men van deser tijt voirwairt van onsen weghen bi onsen beveelnesse scieren ende maken sal metten ghemeenen^j lande becosten sal met met ghelike also groet alse voirscreven es, ende die te bedriven mit onsen dijcgrave ende met sinen ghesworne van onsen weghen alse recht is ende voirscreven is, ende dit ewelike te dueren.

Ghegheven in Middelburch^k op den Palmen sonnendach int jair viertich.