Registers van de Hollandse grafelijkheid 1299-1345

Graaf Willem IV erkent dat hij zijn knaap Gijsbrecht van Alblas 200 pond Hollands schuldig is vanwege paarden en onkosten op diens reizen in verband met de oorlog, en kent hem en diens echtgenote Mabelie, dochter van wijlen heer Jacob van Lichtenberg, ter afbetaling daarvan voor de duur van de langstlevende van hen een jaarrente van 25 pond Holland toe uit de Heloord en andere oorden en uitlanden aan de Maas te Drimmelen; en wanneer deze goederen in een jaar geen 25 pond opbrengen, zal de rentmeester van Zuidholland het verschil bijpassen.

Willem^b ..grave van Heynnegouwen^c etc. maken cond allen luden dat wi sculdich waren Ghijsbrecht^d van Alblaes, onsen knape, twe hondert pond Hollands^e van paerden ende van alrande cost die hi in onsen dienst ghedaen hadde in alre hande reysen omme des oirloghes wille, also als hi gherekent hevet voir onsen Raed die wire toe gheset hadden, als heren Dirc van Matenisse, meester Clays Stuec ende Raesen van Liedekercke^f, voir^g wilke CC lb. wi hem bewijst^h hebben ende ghegheven mit desen tieghenwoirdighen brieve eenen oert die op die Maese gheleghen is ende hiet die Helle oert, ende anders alle die oirde ende uyt lande die in Drie milen gheleghen sijn up die Mase, in manieren voir elc VIII lb. Hollands een pond Hollands tsyairs, dat coemt voir dese CC lb. voirs. XXV lb. Hollands tsyairs; welke oerde ende uyt lande voirs. Ghijsbrechtⁱ voirs. ende Mabelie sijn wijf, heren Jacobs dochter was van Lichtenberch, vrylike ghebruken sullen also langhe als hoir enich levet; ende soe wannere dat hoere beyder brake, soe soude dese voirs. oirde ende uytlande vrylike weder op ons comen of op onse nacomelinghe. Ende wat an dese XXV lb. Hollands tsyairs ghebrake, dat sal onse rentemeester van Zuutholland^j die nu is of namaels wesen sal Ghisebrechte^k ende Mabelien sinen wive voirs., of den ghenen die langhest leven sal van hem beyden, uytreken ende betalen sonder anders enighe brieve dair of te hebben van ons of van onsen nacomelinghen, alle jare toit elken Bamisse^l. Ende alle dese voirwairde voirnoemd beloven ^m Ghisbrechten ende Mabelienⁿ sinen^o wive voirnoemd vaste ende ghestade te houdene voir ons ende voir onse nacomelinghe, behoudenlike allen den brieven die wi of onse ouders ghegheven hebben op dit voirnoemde goed voir desen dach.

In orconde etc. Ghegheven tote Denremonde des saterdaghes na des heylichs Sacraments dach int jair XLI^o.