Registers van de Hollandse grafelijkheid 1299-1345

Heer Hugo Mensenz., prior van Egmond, en broeder Dirk van den Zande, prior van de Dominicanen te Haarlem, geven vidimus van een oorkonde d.d. 1325 oktober 10 waarin Hendrik van Brederode bij testament bepaalt dat, mocht hij overlijden zonder wettig nageslacht, zijn echtgenote jonkvrouw Isabella van Fontaines al zijn roerende goederen in vrij eigendom zal erven, ter compensatie van de 2200 pond Hollands waarmee zij zijn schuld heeft gedelgd; het testament wordt gewaarborgd door graaf Willem III, die de oorkonde meebezegelt.

Vgl. voor de gevidimeerde oorkonde, het testament d.d. 1325 oktober 10, de deels gelijkluidende oorkonde van dezelfde datum onder nr. KE 96.

Wi hair Hughe Mensen soene, prioer van Egmonde, ende broeder Dieric van den Zande, prior van den Jacopinen te Hairlem^a, maken cond ende kenliken allen den ghenen die desen brief sullen sien of horen lesen dat wi ghesien hebben ende ghehoert ene lettere wel sprekende in desen woirden die hier na ghescreven staen.

Allen den ghenen die desen brief sullen^b sien of horen lesen, wi Heynric^c van Brederode^d saluut met kennessen der waerheyt. Wi maken cond ende kenliken allen luden dat wi in goeden live, machtich onser redene ende onser wijf^e, wel beraden ende met vryen wille op draghen ende gheven in rechten testamente Ysenbeel van Fonteynes onser liever ghesellinnen, joncvrou van Brederode, onsen wive, onser zielen oerbaer mede te doene, ende voir twie ende twintich hondert pond Hollands^f die si in onsen oirbaer ende in onsen scout gheleghet hevet, met wilken twie ende twintich hondert ponden si horen wille mochte hebben ghedaen ende vrilike ghebruket, na onser doit alle onse inboedel of have, beesten tam ende wijlt, cleynoit, ghelt, coren ende al onse ander roerende goed, oic hoet ghenomet^g es, dat wi laten in onser doet, niet uyt ghenomen, in deser manieren: es dat sake dat wi eer sterven dan si sonder wittachtighe boerte van hare, dat^h si al dit voirghenoemde hebben sal vri ende onbesletⁱ na onser doet, in vrien eyghendomme^j haren oirbaer ende haren vryen wille mede te doene onghehindert, ende onser zielen mede teghedenkene, als wi op haer betrowen.

Ende omme dat wi willen dat dit voirghezeghede testamente onser scout in allen manieren ghestade ende vaste blive, sonder yemens weder segghen, soe^k hebbe wi desen brief voir gheseghelt met onsen zeghele; ende hebben ghebeden enen hoghen prince^l, onsen lieven here heren Willaem grave van Heynnegouwen^m etc., dat hi desen brief met ons bezeghelen wille, ende Ysebelen onser liever ghesellinnen voirs. in al desen goede voirghenoemd houden wille, sonder yemans weder segghen. Ende wi Willaemⁿ grave van Heynnegouwen^o etc. hebben desen brief bezeghelt met onsen zeghele, ende gheloven omme Heynrics^p bede voirs. dat wi joncvrou Ysenbelen voirs. houden sullen in allen ghereiden goede als hier voirscreven es, dat Heynric^q laten sel in sinre doet. Ghegheven inden jare ons Heren M^o CCC^o vive ende twintich op sinte Victoers dach^r.

Ende omme dat wi haer Hughe Mensen zone ende broeder Dirc van den Zande voirghenoemd dese lettere voirscreven ghesien ende ghehoert hebben also als hier voir staet, soe hebben wi desen brief beseghelt met onsen zeghelen. Ghegheven int jaer ons Heren M^o CCC^o ende neghen ende twintich des anderen daghes na Kersdach.