Registers van de Hollandse grafelijkheid 1299-1345

Graaf Willem IV beleent zijn kleermaker Willem van der Camer met 16 morgen nader omschreven land in Ouderkerk aan de Amstel, geheten de Porterweide, met bijbehorende twee hofsteden en tuinen, dit in plaats van de twee jaarrenten van 8 en 5 pond Hollands die hij hem eerder schuldig was.

Willem grave van Heynnegouwen^c etc. maken cond allen luden. Want wi Willem van der Camer, onsen snider, omme menighen dienste die hi onsen lieven here ende vader, dair God sie ziele of hebben moete, ende ons ghedaen heeft ende doen zal, ende overmits enen open brief bezeghelt mit ons liefs vader zeghele ende mit den onsen, die hilt van VIII lb. Hollants^d tsyars die wi hem sculdich waren te sinen live, item enen anderen brief beseghelt mit onsen zeghele, die hilt V lb. Hollants^e oec te sinen live die wi hem alle jare sculdich waren, welke brieve hi ons over ghegheven heeft alle beede ende ghescoert zien, ghegheven hebben ende gheven XVI morghen lants die men hiet die Porter^f weyde, ligghende bi der Ouder kercken^g tote Aemstel, met tween hofsteden ende thuyninghen die dair toe hoeren, also alst hare toe comen es; ende ane dat voirs. lant leghet die Aemstel up die oestside, tMarctvelt up die zuutside, sPapen meer up die westzide ende Meyne Clays Ruysken soens lant up die noertside, ende die hofsteden ligghen int dorp tot Aemstel bi der brugghen, ende die thuninghe legghen after torp voirs. Welc lant, hofsteden ende thuninghe voirscreven wi verliet hebben ende verlien Willem voirs. ende sinen nacomelinghen van ons ende van onsen nacomelinghen te houden ten rechten lene.

In orconde^h etc. Ghegheven in den Haghe up sinte Andries dach anno XXXIX^o.