Registers van de Hollandse grafelijkheid 1299-1345

Graaf (Willem IV) doet uitspraak met betrekking tot de doodslag op Willem van Adrichem.

Het is twijfelachtig of deze uitspraak ooit is uitgevaardigd in de vorm van een oorkonde.

¶ Dit is mijns heren sgraven zegghen van Willaems^a doet van Adrichem.

In den eersten seyt mijn here Gherijt de Hoghen ballinc sijns lands.

Item seyt mijn here Willaems^b ziele te ghenaden cloester winninghe tuschen Mase ende Zipe alse sede ende woente is in Noirtholland^c, ende des betoech te brenghen ten lesten daghe.

Item seyt mijn here Willaems^d ziele te ghenaden IIII^C zielmissen, ende des te^e betoghen ten lesten daghe.

Item seyt mijn here twe manne uute Gherijts^f Hoghen mascepe^g, achtersuster kint jof dair binnen, Willaems^h siele te ghenaden bedevairt te doene tot sinte Jacobs in Galissen, ende die te kiesen bi den menen maghen twischen nu ende Kersavondⁱ naistcomende; droeghens die maghe niet over een, soe soudse die bailiu kiesen binnen achtdaghen na Kersavond voirscreven. Ende dese twe zullen purren ende op den wech wesen voir Beloken Paischen naistcomende^j, ende niet weder te keren eer si die bedevairt ghedaen hebben, ende des betoech brenghen.

Voirt sel die hele soene costen III^C lb. Hollands^k; des sel gaen ter voirsoene LXXX lb., ter erfzoene LX lb., ter maechzoene LX lb. ende minen heren tot sire verboirnisse C lb., te betalen dat eerste dordendeel op den eersten dinghe dach te Hairlem na meye dach naistcomende^l, ende tot elken zes weken dair na yen dordendeel. Ende die voirzoene selmen delen bi vier manne van den maghen dair sijs over yen draghen; droeghen sijs niet over yen, soe selmense delen bi den bailiu.

Ten middelsten daghe selmen voirvede^m kiesen, ende die voirvede selmen doen ten lesten daghe.

Ende dese zoene ende dese bedevairt sullen Gherijts Hoghen maghen doenⁿ; ende wair dair enich ghebrec an, dat soude onse bailiu uut doen reyken.

Ghedaen tote Hairlem des saterdaghes na sinte Lucien dach int jair XLII^o.