Registers van de Hollandse grafelijkheid 1299-1345

Zweder van Montfoort belooft zich te zullen houden aan de uitspraak gedaan door graaf Willem III inzake Zweders twist met zijn zoon Hendrik de Rover en diens helpers.

Vgl. de voorafgaande oorkonde nr. WO 70 in het register, alsmede nrs. UT 34, 46 en 58.

Ic Zueder van Montfoirde make cond allen luden. Want mijn lieve here, here Willaem^a ..grave van Heynnegouwen^b etc., mi weder gheholpen hevet in den besitte van minen huse te Montfoirde, in miere heerscippien, gherechte, tienden ende in allen goede dat dair toe behoirt, des mi Henric^c die Roever mijn soene ende die ghene die met hem waren onghebruke ghedaen hadde, soe ghelove ic bi miere trouwen ende bi miere zekerhede alsulc segghen als mijn here die ..grave voirs. ghezeghet tuschen mi ende Henric^d den Roever minen sone ende anders minen kinderen, Roelof den Roever minen broder, minen zusteren, den poirteren van Oudewater, minen landluden die onder mi wonen ende anders allen den ghenen die in Henric^e Rovers mijns soens helpe waren, vaste ende ghestade te houden in allen manieren als mijns heren sgraven brief houd van den segghen voirscreven, dair dese brief doir ghesteken es. Voert belove ic bi miere trouwen ende bi miere zekerhede dat ict also verwaren sal alse langhe als ic leve dat minen heren den ..grave voirs. noch sinen nacomelinghen noch sinen lande en ghene scade noch scande ghescien en sal van minen huse of van miere heerscippe van Montfoirde, noch van minen luden die onder mi wonen, also verre als ict ghekeren mach, in goeden trouwen sonder archlist.

Ende want ic alle stucken in dien segghen ende in desen brief voirscreven wittelike ende trouwelike houden wille, soe hebbe ic desen brief open bezeghelt met minen zeghele; ende hebbe ghebeden omme der meerre zekerhede minen lieven maghen ende vrienden heren Henric^f van Loenreslote, deken van sinte Jans tUtrecht^g, heren Zueder van Vyanen ridder, Hubrecht den Scenc van Besichen, Henric^h van Vyanen, Jacob Jans sone ende Janne van Lichtenberch, knapen, dat si dit op mi oirkonden ende desen brief met mi bezeghelen. Ende wi Henricⁱ van Loenreslote, deken van sinte Jans tUtrecht, Zueder van Vyanen ridder, Hubrecht^j den Scenc van Bezichen, Henric^k van Vyanen, Jacob Jans sone ende Janne van Lichtenberch, knapen, omme die mere zekerhede ende omme bede Zueders van Montfoirde ons neven voirscreven orkonden dit op hem ende hebben desen brief met hem open bezeghelt met onsen zeghelen.

Ghegheven toit Utrecht des manendaghes voir meye dach int jair ons Heren M^o CCC^o zeven ende twintich.

Ista littera est sub Engheberto.