Registers van de Hollandse grafelijkheid 1299-1345

Graaf Willem III legt een nader omschreven zoen op in de twist tussen Jan Jacobsz. van Grijpskerke enerzijds en Jan en Boudewijn vrouw Hadewij's kinderen anderzijds met hun wederzijdse verwanten, vrienden en helpers, ontstaan naar aanleiding van de dood van Wouter Jacobsz. van Grijpskerke.

De bovenstaande datering is gebaseerd op de veronderstelling dat de paasstijl is toegepast. Zie de Inleiding.

Wi Willaem^a grave van Heynnegouwen^b etc. maken cond etc. Want Jan Jacobs sone van Grijpskerke^c met zinen maghen, vrienden ende helpers op die ene zide ende Jan ende Boudwijn^d veren Hadewi kindere met horen maghen, vrienden ende helpers op die ander zide van allen twiste ende parlemente die zi onderlanghe hadden van Wouter Jacobs soens doet van Grijpskerke^e ende dat daer of gheroerd es ane ons gheblevan sien, soe segghen wi daer of onse zegghen in manieren dat hier na ghescreven staet. In den eirsten zegghen wi dat Jan ende Boudwijn veren Hadewi kindere ghelden zullen Wouter Jacobs sone hondert ende vijftich pond zuarter Tornoyse^f, ende zi zullen beyde bedevaerd varen tote onser Vrouwen te Ritchemadoene, Wouters ziele te ghenaden; voird zullen zi ons gheven van horer verboirnesse hondert pond Tornoyse^g. Ende men zal alle smerte an beyden ziden ghelden een scat, ende die smerte zalmen brenghen voir heren Niclayse^h van Catse ende voir Gillijs Boudwijnsⁱ sone, onsen bailiu van Middelburch^j. Ende dese zoene ende verboirnesse voirscreven zalmen ghelden te drien tiden binnen den jare, telken zeventien weken een derdendeel; ende ten eirsten daghe salmen betalen alle smerten, ten middelsten daghe zalmen manscippe ende voir eede doen. Ende waer dan yemant buten onsen lande wonende^k die die zoene niet hebben en wilde van sdoeden maghen, ende die Jan Jacobs sone ende zinen maghe bi goeden trouwen daer toe niet hebben en mochten dat zi die zoene namen, soe soudmen Jan ende Boudwijn veren Hadewi^l kindere voirs. alsoe vele ghelts weder gheven alse dien luden van rechter maechsoene bi goeder rekeninghe toe behoeren mochte, ende dat jeghens hore vete. Voird zullen Jan ende Boudwijn voirs. hore bedevaerd op die^m reyse of wesen voir Bamisseⁿ naist comende, ^o niet weder te keren voir dat zi die bedevaerd voldaen hebben. Ende hier bi zegghen wi ene alinghe zoene; ende soe wie die brake, dat waer op zijn lijf ende op zijn ghoed.

In oirkonde etc. Ghegheven in Middelburch^p des vridaghes na Half vasten int jaer ons Heren M^o CCC^o drie ende twintich.