Registers van de Hollandse grafelijkheid 1299-1345

Graaf Willem III verkoopt zijn knaap Jan Arnoudsz., poorter van Zierikzee, een moerdijk binnen Bertseldijk genoemd Crayenamer, met enkele bepalingen betreffende onder meer de aanstelling van schepenen, de uitvaardiging van keuren en de heffing van boeten.

Vgl. nr. ZE 293. De dienstaantekening aldaar heeft mogelijk ook betrekking op de oorkonden nrs. ZE 294-296.

Wi Willaem^a grave etc. maken cont allen luden^b dat wi vercoft hebben Jan Arnouds^c f.^d onsen trouwen knape, porter^e van Zirxe^f, enen moerdijc binnen Bertseldijc^g die men heet Crayenamer, alse groet als hi vallen mach, tonser orbare ende ter siere; ende dien zal^h hem beleyden van onsen weghen Jan Wissen f.ⁱ onse rentemeester van Beoesterscelt^j alse weselike es, ende die salne daer up^k houde van onsen weghen, elc ghemet om achtien scellinghe groter Tornoyse^l te twien jaren te ghelden, die ene helfte te sente Pieters daghe ingaende oeste^m ten eersten brande ende die ander helfte te sente Pieters daghe ingaende oest ten anderen brande. Ende hi zal hebben van elke XXV ghemete een ghemet lecscat vri, ende al gheldelant beneden enen ghemete zal hi ghelden; ende gheldeland dat an enen stucke groet es een ghemet jof daer boven, daer zal onse rentemeester onse orbaer mede doen, zonder arghenlist. Ende alt lant dat wi selve in desen moerdijc hebben tote vier ghemeten toe, dat gheven wi hem lecscat vry ende wi scelden quite van allen litcope, in versette van siere scade die hem Hughe Prijsbierⁿ dede. Ende desen moerdijc zal hi hebben ter Zeuscher^o koire ende ten moerdijcsen rechte. Ende gheven hem macht^p scepen te maken ende die of ende ane te done, ende bot ende koere bi desen scepen te maken die hi waent dat slans orbaer sijn; ende zoe wat boten dat daer verscinen beneden XXVII s. die zullen sine wesen, ende bote van XXVII s. ende daer boven die zullen onse wesen. Ende waer dat hem yemant ontfoer met sinen lecscat^q, met selle jof met teringhe erghent in onsen lande, dien gheven wi hem orlof met sinen scepen weder te halen sonder verbornesse jeghens ons, behouden elken man sijns rechts, sonder erghenlist. Ende hi zal zoden nemen binnen Bertseldijc^r over al daer wi veynoet ane sijn sonder sinen cost; ende daer wi gheen veynoet ane en sijn, zal hise nemen om zulken cost als onsen rentemeester Beoesterscelt^s denket dat weseliken es.

In orconde etc. Ghegheven tote Zirixe^t des donresdaghes vor sente Symon ende Juden dach int jaer ons Heren M CCC vier ende twintich^u.