Registers van de Hollandse grafelijkheid 1299-1345

Graaf Willem III verpacht abdis en convent van Bethlehem het land Vorsker voren in Oude Hugelijnszand voor de duur van tien jaar, met uitzondering van de tienden maar inclusief de ernaast gelegen middeldijk, en met de bepaling dat wanneer de voorgenomen inlaagdijk wordt aangelegd in dat jaar 30 groten Tournois van de pachtsom mogen worden afgetrokken.

Wi Willaem^a grave etc. maken cont allen luden^b dat wi religiosen^c vrouwen der abdissen ende den ghemenen convente van Bethlehem^d te pachte ghegheven hebben van Bamisse^{e f} naest comende tien jare daer nae durende al onse lant Vorsker voren^g dat wi legghende hebben in Oude Hughelijns sand^h, mit den middeldike die neffens den lande leghet, also alsen nu die pachtenaers ghebruken, behouden ons onser tiende van den vorscrevenⁱ lande, om X lb. groter Tornoyse^j sjaers vries ghelts, te betalen alle jare die ene helfte tote Vastelavond^k ende die ander helfte tote Biervlieter market na der note. Ende desen pacht zullen si onsen rentemeester Beoesterscelt^l versekeren binnen onser porte van Zirxe^m jaerlix te betalen, ende dit land zullen si houden van diken ende van wateringhen buten onsen coste. Mar want men seghet dat men cortelike ene insate maken zal in den lande vorscreven, soe est vorwaerde als men die inzate maket dat wi hem in den selven jare of slaen zullen van haren pacht vorscreven, te hulpe van hare scade ende van haren coste die si an den dijc legghen, XXX s. groter Tornoyseⁿ; ende daer tenden zullen si ons onsen vollen pacht gheven. Ende dit vorseyde land zullen wi hem vryen ende daer in bescermen alsoe dat sies vryelike ghebruken moghen also langhe als haer pacht duret; ende alle stucken vorscreven sonder arghenlist.

In orconde etc. Ghegheven in Middelburch up Alre heylighen dach in anno XXIIII^o.