Registers van de Hollandse grafelijkheid 1299-1345

Graaf Willem III stelt zijn knaap Waddin Hendriksz., poorter van Zierikzee, en diens zoon Hugo Welle voor de duur van hun leven in het bezit van het schroodambacht van Zierikzee, onder voorwaarde dat zij wijn en proviand van de graaf of zijn echtgenote en kinderen gratis zullen schroden; Waddin heeft hem hiervoor 100 pond Tournois betaald.

Wi Willaem^d grave etc. maken cond allen luden^e dat wi Waddijn Henrix^f zone, onsen trouwen knape ende poirter van Zierixzee^g, ende Hughen Wellen^{h i} sinen sone^j ghegheven hebben ende gheven met desen brieve tote haire beyder live, zoe wilc hair van hem beyden levede, te besitten alze langhe als hi levet onse scroidambocht van onser poirten toit Zierixzee^k alzoe alst ons toe behoird ende weder ane ons bestarf van Popen^l van Renisse, diet van ons helt toit zinen live, te houden ende te verwaren met alle vervalle datter of comen mach ende te comen pleghet na sede ende na coustume alst hair toe ghecomen es, ende met sulken arbeyde dair of te doene alser toe behoird; ende hier bi sal Waddin voirs. ende Hughe Welle zijn zoen, zoe wilc hore ^m dit scroidambocht besid, alsulke wine ende pourvanche als wi jof onse gheselline die gravine jof onze kinderen toit Zierixzeeⁿ senden sullen toit onser pourvanchen jof den haren doen werken, scroden ende berechten buten onzen cost, onser ghesellinen ende buten^o onser kinder cost voirscreven, zoe wanner dats te done es, sonder alre hande arghenlist. Ende hier of heeft^p ons Waddijn voirs. ghegheven ende bitaild bi Jans hand van Leyden ons capellains, dier of rekenen zal, hondert pond Tournoyse^{q r}, den groten over zestien penninghe gherekend, dair wi ons of ghepayt houden.

In oirkonde desen brieve bezegheld med onzen zeghel^s. Ghegheven tote Valenchijn^t op sente Clements dach int jaer ons Heren M^o CCC^o XXVII^o.