Registers van de Hollandse grafelijkheid 1299-1345

Hendrik abt van Middelburg geeft vidimus van vier oorkonden d.d. 1311 okt. 1 en nov. 5 waarin Jan van der Dussen, Gizekijn van den Dorp, Floris de Molenaar en Nicolaas en Lodewijk van der Merwede verklaren van graaf (Willem III) geld te hebben ontvangen in verband met de zoen betreffende de dood van Jan Simonsz. van Malland, hun neef, waarbij zij beloven de zoen te zullen handhaven, de gelden volgens de grafelijke uitspraak te zullen verdelen over de rechthebbenden, en hun verwanten naar vermogen bij de zoen te zullen betrekken.

Wi Heynric bi der ghenaden Gods abt van onser Vrouwen cloester in Middelburch^b maken cond allen luden dat wi ghesien hebben deser goeder lude letteren die hier na volghen, wel ende ghanseliken bezeghelt mit hairs selfs seghelen, van worde te worde aldus sprekende.

Wi Jan van der Dussen^c riddere make cond allen luden dat ic van mijns heren sgraven weghen ontfanghen hebbe van drien terminen die soene die mi mijn here die grave toe gheseyd hadde van Jan Symons soens doit van Malland ons neven, hondert achtiene pond ende^d vichtien scellinghe Tornoyse^e, den groeten Tornoyse over sestien penninghe gherekent, van den tween ersten terminen bi Pieters hand van Leyden ons heren sgraven capelaen ende rentemeester van Zeeland, ende van den derden termine bi Pieters hand Reyniers soens. Die achtiene pond hebbe ic belovet te bringhen ende XV s. onder die maghe van Holland^f dair si mit den rechte ghaen sullen na sgraven segghene, ende mit den hondert ponden die maghe buten Zeeland^g te moet soene; ende ware dat sake datter enich van den maghen ware die ic in die zoene niet mit mi^h brenghen en mochte, so soude ic van desen ghelde minen here den grave alse vele gheven alse hem selven goed denket tote sijns selfs segghene, na den wesene van den persoen die buter der soene blivet. Ende omme dat ic mi hier in verbonden hebbe, so hebbe ic desen brief open etc. Ghegheven te Scoenhove int jaer ons Heren M° CCC° ende elve in sente Baven daghe.

Ic Ghisekijnⁱ van den Dorpe make cond allen luden^j dat ic bi hair Pieters hand van Leyden ons heren sgraven rentemeester van Zeeland^k, van der soene van Jan Symons soens doit van Malland ons neven, die ons onse here die grave toe gheseghede^l van dien van Berghen van onsen achtendeel ter machzoene, ontfanghen hebben IX lb. VII s. ende VI d. Tornoyse, den groeten over sestien penninghe gherekent; noch hebbe ic van Jan Symons doit voirs. ontfaen bi heren Pieters hant voirs. van onsen achtendele ter voersoene vijf ende twintich pond Tornoyse, den^m groeten over sestien penninghe gherekent. Ende omme dat ik dese soeneⁿ van desen achtendele vol ende al ontfanghen hebbe^o also alse ons onse here die grave toe gheseyde^p, so hebbe ic belovet dit zoendinc wittelijc ende ghetrouwelijc te houden ^q ende dit ghelt te delen onder onse maghe dairt mit den rechte ghaen sal alse ons heren sgraven segghen hout. In orkonde etc. Ghegheven int jaer ons Heren M CCC ende elve des vridaghes na Alre heylghen daghe.

Ic Floris die Moilnair make cond allen luden dat ic ontfanghen hebbe^r van mijns heren sgraven weghen vijf ende twintich pond zuarter Tornoyse, den groeten Tornoyse overe sestien penninghe gherekent Tornoyse^s, also alsi gheset^t waren te drien termine van der zoene van Jans Symons soens doit van Malland, bi Pieters hant van Leyden ons heren sgrave capelaen ende rentemeester van Zeeland van ersten twen terminen, ende van den derden termine bi Pieters hand Reyniers soens. Waer omme ic belovet hebbe voir heren Pouwelse van Almsvoete riddere, minen broedre, ende voir mi in goeden trouwen die maghe buten Zeeland^u int zoending te bringhen na onse vermoghen; ende ware dat sake datter lude waren die wi mit ons in dat zoendinc niet brenghen en mochten, so souden wi van desen ghelde alse vele weder ute gheven alse onsen here den grave redelic ende moghelijc dochte na den wesene van den persone diere buiten bleve. In orkonde etc. Ghegheven int jaer ons Heren M CCC ende elve op sente Baven daghe te Scoenhove.

Wi Nyclaes^v van der Merewede^w ridder ende Lodewijc van der Mereweden^x, broeders, maken cond allen luden dat^y wi ontfanghen hebben van onsen here den grave te drien termine die zoene van Jan Symons soens doit ^z van Malland ons neven, hondert ende dortich pond zuarter Tornoyse, den groete Tornoyse gherekent over sestien penninghe zuarter Tornoyse, van den tween ersten terminen bi Pieters hant van Leyden ons heren sgraven capelaen ende rentemeester van Zeeland, ende van den derden termine bi Pieters hant Reyniers sones; ende wi hebben ons verbonden dese soene witteliken ende ghetrouweliken te houden, ende dairtoe te helpene in goeden trouwen dat onse maghe mede in dese soene comen up ons heren sgraven segghen dair of. In orkonde etc. Ghegheven int jaer ons Heren M CCC ende elve in sente Baven daghe te Scoen hoeve^a'.

Ende in kennessen hier of dat wi dese letteren ghesien hebben also alset voirscreven^b' es, dair omme hebben wi desen brief open bezeghelt mit onsen seghele^c'. Ghegheven int jaer ons Heren M CCC ende tuelve des donnerdaghes voer Kersavont.