Registers van de Hollandse grafelijkheid 1299-1345

Graaf Willem III verpacht Nicolaas Hugenz. van Sabbinge met de 4 gemet tienden te Sabbinge die deze met zijn toestemming van Willem Jansz. van Schengen had gekocht.

Vgl. het voorafgaande nr. ZE 615 alsmede nrs. ZE 559 en 560.

Willaem grave etc. maken cond etc. Want Willem^b Jans sone van Schenghe^c voir ons quam ende verliede dat hi van sinen twailf ghemete tienden, legghende in Sabbinghe ende in Westkerke in Wolfairds dike^d, vercoft hadde alsoe verre alst onse wille ware Janne heren Jans sone van Sabbinghe vier ghemete tienden in deelinghe van den tiende voirscreven, ende hi ons dair of^e sine opene brieve of^f op ghelevert heeft, dair Jan van Sabbinghe voirs. onsen openen^g brief of heeft; voirt heeft Willaem^h Jans sone voirs. vercoft bi onsen wille van den selven XII ghemete tienden in Sabbinghe Clais Hughen sone van Sabbinghe vier ghemete tienden, alsoe blieven noch Willem voirscreven van deser voirseider tienden vier ghemete tienden, dair hi onsen openen brief of heeft; ende die vier ghemete tienden voirscreven die Clais Hughen sone voirs. bi onsen wille ghecoft heeft jeghens Willem verlien wi Claise voirs. mit desen brieve, behouden elken anderen sijns rechts, van ons te houdene ende te besittene in allen manieren als die brief houd die bi wilcoir van ons ende van onsen mannen van Zeelandⁱ dair of ghemaict ende beseghelt es; ende hier of sal hi ons jairlix te pachte gheven achtien penninghe Hollands^j.

In orkonde etc. Ghegheven toit Dordrecht^k des sonnendaghes na Paischen anno XXXIII°.