Registers van de Hollandse grafelijkheid 1299-1345

Graaf Willem III geeft Coppard Stuuc, Hein van der Wijn en andere poorters van Dordrecht toestemming om Engelse personen en goederen te arresteren totdat de schade die zij door de Engelsen hebben geleden en voor zover zij die voor de baljuw van Zuidholland en de Dordtse magistraat kunnen aantonen zal zijn vergolden; alle geconfisqueerde goederen dienen in handen van de genoemde gezagsdragers te worden gesteld.

De onderstaande tekst is gebaseerd op afschrift B.

Wi Willaem grave van Henegouwen^b etc. maken cont allen luden dat wi oirlof ghegheven hebben ende gheven Coppaerd^c Stuuc, Heynen van der Weyne ende anderen onsen poirters van onser stede van Dordrecht^d te pandene ende te erresterne op die van Engheland ende an haer goet, voir alsulke scade als die van Engheland hem ghedaen hebben ende si betoghen moghen alse recht es van onser stede voernoemd voir onsen baeliu van Zuitholland^e ende voer onse scepene ende onsen raet van onser stede voerseyd, in manieren so wat dat^f si arresteren jof panden op die van Engheland voirs., dat si dat brenghen zullen alghehelike ende ongheminnerd onder onsen baeliu ende onder onse scepene ende raed^g voers.^h in seker handen totederⁱ tijt dat onsen voers. poirters ghenoech ghedaen es van alle horen scade die zi ghenomen hebben ende betoghen moghen alst voers. es. Ende hier voren soe sullen zi zeker doen onsen baeliu ende onsen scepenen ende onsen raed van onser stede voers. dat sijt in deser manieren hanctieren zullen; ende voerd mede^j dat si op niement arresteren noch panden en sullen noch man noch ghien goet, en sal wesen uut Engheland^k ende den Enghelsen luden toe behoeren. Ende ombieden ende beveelen allen onsen baeliuwen ende rechters van onsen lande voers. dat si onse voers. poirters in desen voerseyden dinghen holpen^l ende starken, ende dat si des niet en laten.

In kennesse van deser^m ding hebben wi desen brief bezeghelt met onsen zeghele, die gheduren zal tote onsen weder segghene. Ghegheven int jaerⁿ ons Heren M^o CCC een ende twintich des woensdaghe na sinte Baven dach.