Registers van de Hollandse grafelijkheid 1299-1345

Graaf Willem III doet uitspraak in een twist tussen enerzijds heer Otto van Asperen, ridder, en anderzijds Mouris, poorter van Dordrecht, en diens kinderen, en legt beide partijen een zoen op.

De onderstaande tekst is gebaseerd op afschrift B.

Wi Willaem^d grave van Henegouwen^e, van Holland^f etc. maken cond ende kenlic allen luden dat wi een segghen gheseyd hebben tuschen heren Otten van Asperen^g ridder an die ene zide ende Mourissen onsen poirter van Dordecht^h ende sinen kindren andie ander zide, alse van alsulken eyske alse hair Otte voerseyd Mourissen tyende was ende Mourisse voers. heren Otten weder tyende was, waer of hair Otte ende Mourisse voers. an ons bleven sien. In den eersten es onse segghen dat hair Otte voers. ghelden zal Mourisse onsen poirter alse van vier ende twintich morghen lands die gheleghen sien in heren Otten lande, en ware jofts meer jof mijn wareⁱ, ter rechter warheyde van elker morghen vier pond goeder Hollands^j, hier of te gheldene die ene helfte binnen den halven jare dat nu naist comet ende die ander helfte binnen den halven jare dair naist comende; ende dit voerscreven ghelt zal hair Otte voers. leveren binnen des graven lande van Holland^k ende betalen. Ende voirt van desen voirs. lande dat Mourisse voers. houdende was sestien morghen van Walraven van Benthen^l, dat zal hi heren Otten voers. vrien tyeghens Walraven voers., ende hier bi zal hair Otte voers. desen voerseyden Mourissen dit voerseyde land ghelden ghelike den anderen lande. Voird so wat dese voers. Mourisse sculdich was binnen Asperen^m voer die tijd dat hi poirter Tordrechtⁿ werd, ende dair brieve of sien van scepene kennesse ende kenninghe van Asperen^o, die^p zal hi ghelden; ende wat sculde diemen eyskenden es desen voerseyden Mourisse dair ghene scepene kenninghe^q of en es, daer zal hi elken recht voer doen binnen Aspere^r jof tote Dordrecht^s; ende dair binnen zal hi een^t goed gheleyde hebben te varen binnen Asperen^u ende te keren. Voerd segghen wi doet alle die brieve die ghemaect waren op Mourissen voers. seder dat hi poirter woerden es tote^v Dordrecht^wx. Voerd so^y segghen wi quite Mourisse alse van den coste die hem hair Otte voerseyd eyskende was alse van der muren die gheet^z omtrent Asperen^a', ende wi segghen quite die achte ende twintich pond Tornoyse^b' die Mourisse eyschende was haren Otten van enen paerde. Ende hier bi zalt wesen ene vaste zoene ende ene ghestaede tuschen heren Otten^c' voers. ende Mourissen onsen poirter ende al sinen kinderen, alse dat si varen moghen binnen Asperen^d' vri ende quite, ghelike anders onsen poirteren.

Ende omme dat wi willen dat dit vaste ende wel ghehouden blive, zoe hebben wi desen brief bezeghelt met onsen zeghele. Ghegheven tote^e' Dordrecht^f' int jaer ons Heren dusent drie hondert twie ende twintich des sonnendaghes na sinte Servais^g' dach in meye.