Registers van de Hollandse grafelijkheid 1299-1345

Pieter heer van der Lek verkoopt de visserij te Lekkerkerk aan Jan heer Gillisz., poorter in Dordrecht, die deze van hem in recht leen zal houden, maar met de mogelijkheid voor hemzelf tot lossing binnen twaalf jaar; de oorkonde wordt meebezegeld door Pieters zoon Hendrik en door graaf Willem III.

Wi Pieter here van der Lecke maken cond etc. dat wi vercoft hebben onse viskerie die gheleghen es van Leckerkerke nederwaert^a streckende tote Boelnisser slote toe, ende van Boelnisser slote weder in die Merwede^b streckende toten utersten kante van Waelmonde^c, onsen lieven vriend Janne heren Gillijs sone, porter in Dordrecht^d, hem ende zine nacomelinghen van ons ende van onsen nacomelinghen te houden tenen rechten ^e erfliene met alle den rechte datter voirseyder viskerie toe behoirt, omme dertich pond groter coninx Tornoyse^f, die wi van hem ontfanghen hebben; ende dese voirseyde viskerie zoe moghen wi lossen binnen twaelf jaren naist comende om dertich pond goider Hollands^g jaerliker renten die wi of onse nacomelinghe hem of zinen nacomelinghen vrielike bewisen moghen binnen Dordrecht^h legghende an die strate in goider legheninghe, jof om drie hondert pond goider Hollandseⁱ penninghe. Ende waer dat sake dat Jan sheren Gillijs sone voirs. storve voir Jan zinen zone die hi nu heeft bi veren Lizebeth^j zinen wive, soe soude dese voirseyde viskerie comen op Jan zinen zoen voirs., ende die zal hi houden van ons ende van onsen nacomelinghen tenen rechten erfliene. Ende dese voirseyde vischerie beloven wi hem te waerne in allen manieren als voirscreven es; ende waert dat daer ane iet ghebrake, dat beloven wi hem te voldoen met anders onsen goide.

Omme dat wi dit vaste ende ghestade willen houden ende ghehouden blive van ons ende van onsen nacomelinghen, zoe hebben wi desen brief bezeghelt met onsen zeghele; ende bidden Henric^k onsen zone dat hi dese voirseyde dinghen vaste ende ghestade houde, ende zine zeghel in kennessen daer of hanghe metten onsen an desen brief. Ende ic Henric^l voirs., omme bede wille mijns liefs vaders voirnoemt ende om dat ic dese voirseyde dinghen vaste ende ghestade houden wille, soe hebbe ic desen brief bezeghelt met minen zeghel. Ende om die merer vastenesse soe hebben wi Pieter here van der Lecke ende ic Henric^m zijn zoen voirnoemt ghebeden enen edelen prence ende enen moghenden onsen lieven here den grave van Heynnegouwenⁿ ende van Holland^o dat hi Janne vors. ende zinen nacomelinghen houde ende doe^p houden in dese voirseyde vischerie in allen manieren als hier voirscreven es, ende hi in kennessen daer of zinen zeghel wille doen hanghen voren an desen jeghenwoerdighen brief. Ende wi Willaem^q grave van Heynnegouwen^r etc., om bede wille heren Pieters here van der Lecke ende Henrix^{s t} sijns zoens voirnoemt, ende omme dat wi Janne voirs. ende zine nacomelinghen in deser voirseyder viskerien houden willen also als^u voirscreven es, zoe hebben wi desen brief doen bezeghelen met onsen zeghele.

Ghegheven int jaer ons Heren M^o CCC^o XXV^o des sonnendaghes na sinte Lucien daghe.