Registers van de Hollandse grafelijkheid 1299-1345

Graaf Willem III beleent Jacob, zoon van Simon van Benthem, met 15 pond Hollands jaarlijks, waartoe hij hem een woning en bijbehorend land in het ambacht Rijswijk toewijst en, mocht dit niet genoeg opbrengen, een deel van de tienden van Delfland en Maasland, dit op voorwaarde dat Jacobs vader en broer ieder ook 15 pond Hollands per jaar geven, en dat Jacob zijn geestelijke goederen opgeeft en leek blijft.

De onderstaande tekst is gebaseerd op afschrift B.

Wi Willaem^a grave van Henegouwen^b, van Holland^c etc. maken cond etc. dat wi omme goeden dienst die ons onse ghetrouwe ridder hair Simon^d van Benthem^e ghedaen hevet ende ons Jacob sijn soen noch doen sal, ghegheven hebben ende gheven Jacob heren Symons sone van Benthem vijftien pond Hollands^f syaers van ons te houden in rechten liene, also verre als hem haer Symon van Benthem sijn vader^g ende Jan van Rosenburch^h sijn broeder elc van hem beyden gheeft ende bewijst vijftienⁱ pond Hollands syaers in zekeren steden, sonder arghenlist, welke vijftien^j pond Hollands syaers wi bewisen hem jaerlix^k in tenemen, ende gheven die woninghe mitten^l lande dat daertoe behoird die ons ane comen es van Willaem Florens sone binnen den ambochte van Rijswijc^m; ende ghebrake ane die woninghe ende ane dien lande voerseyd dat nietⁿ vijftien pond Hollands syaers^o waerd en ware, datter aen ghebreken sal dat sal hi in nemen ute onser tiende van Delfland ende van Maesland die ons ane comen es van Dieric van Warmonde. Ende waer dat haer Simon^p van Benthem ende Jan van Rosenburch den voernoemden Jacob niet en ghoeden elc van vijftien pond Hollands syaers in zeker stede alse voerseyd es^q, zoe zullen wi ane tasten^r an onse goed voerseyd ende zullen vri ende quite wesen van dien vijftien^s pond Hollands sjaers. Ende hier bi soe^t sal hi quite scelden al kerkelic goed ende waerlic bliven; ende dede hijs niet, soe coemt weder onse woninghe ende land voerscreven vrilike ane ons.

In orkonde desen brieve bezeghelt^u met onsen zeghele. Ghegheven Tordrecht des zaterdaghes na sinte Servaes^v dach int jaer ons Heren M CCC twie ende twintich.