Registers van de Hollandse grafelijkheid 1299-1345

Filips van Wassenaar belooft graaf Willem III, die zich voor hem overborg gesteld heeft voor de financiële afspraken in verband met zijn huwelijk met jonkvrouw Elizabeth, dochter van heer Jan van der Dussen, ridder, dat hij hem indien nodig schadeloos zal stellen, onder verband van al zijn goederen.

Voor de in de tekst genoemde oorkonden zie nr. NH 273, alwaar tevens een noot over de hierin gebruikte jaarstijl, alsmede nrs. NH 275 en 276.

Ic Philips van Wassenaer maken^b cond allen den ghenen^c die desen brief sullen sien of horen lesen. Wand een edel prinche ende een moghende, mijn lieve ende gherechte here haer Willaem^d grave van Henegouwen^e, van Holland^f etc., omme mire bede willen voer mi hem verbonden hevet ende overborghe worden es boven mi ende minen borghen voir alsulke voirwaerden die ic gheloeft hebbe in voerwarden van rechten huwelic joncfrouwe Lizebetten, heren Jans dochter van der Dussen, riddre, haren kindren ende horen rechten erfnamen, in alle diere^g manieren alse die brieve spreken die daer op ghemaect sien die ic ende mine borghe, dats te weten haer Dieric borchgrave van Leyden, haer Jacob van den Woude, ridders, Willem^h van Leyden, Jan van der Wateringheⁱ, Dieric van Alkemade ende Dieric van der Made ende mijn lieve here voerscreven bezeghelt hebben, so gheloeve ic ende hebbe^j ghelovet minen lieven here den grave van Henegouwen^k ende van Holland^l voernoemd ende verbinde mi ende mine nacomelinghe op alle mijn goed, roerende ende onroerende, dat ic nu hebbe jof vercrighen mach jof mine nacomelinghe vercrighen moghen, waer dat zake dat alle die voerwarde ghehouden niet en worden in alle dier manieren alse die voerseyde brieve van den voersproken huwelike houden ende onse lieve here die grave daer of, of zine nacomelinghe, scade leden, dat te sinen jof te sire^m nacomelinghe simpelen woerden ofⁿ doen sullen ende scadeloes houden in goeden trouwen, sonder allen arghelist.

In orkonde etc. Ghegheven toter Hurst des sonnendaghes voer Dertienen^o daghe int jaer ons Heren M CCC zes ende twintich.