Registers van de Hollandse grafelijkheid 1299-1345

Graaf Willem III komt met bisschop Frederik II van Utrecht overeen dat deze in diens bestuur steeds de adviezen van enkele met name genoemde raadslieden zal opvolgen, waarbij hem de steun van de graaf wordt toegezegd, met de bepaling dat de bisschop slechts op advies van de graaf en van de genoemde Raad een oorlog mag beginnen waarbij hij grafelijke hulp verlangt.

Vgl. nrs. UT 28, 29, 31 en 35-36.

De onderstaande tekst is gebaseerd op afschrift B.

Wi Willaem^b grave^c van Henegouwen^d etc. maken cond allen luden. Want onse lieve here ende neve here Vrederic, bider ghenaden Goeds bisscops toet Utrecht, omme sonderlinghe jonste die hi toet ons waerd hevet ende omme sinen orbaer ende siere clesien ende sine lande ende ons ende ons lands orbaer an ons begaert hevet ende met ons over ghedraghen es dat hi van allen zaken die roeren moghen sine eere^e jof sinen staet, sine clesie of sijn land ende ons ende onse land werken zal bi heren Arnoude proeft van Aernaem, heren Jacob den proest van Sinte Jans tote Utrecht, meister^f Jan van Florenchen den provoest van Songhies, heren Janne here van Arkel, heren Zueder van Abbecoude, heren Symon van Bentem^g, heren Gheret^h van Raporst, ridders, meister Heyricⁱ sinen clerc, Heynric^j van Diepenem^k ende bi Willaem^l onsen camerlinc. Ende so wat si hem raden dat zal voerwaerd gaen; ende dat hi daer jeghens niet doen en zal, so gheloven wi hem alsulke stucken als hi met desen Rade voerscreven over een draghen zal, sonder arghenlist, dat wi daer in hulpen zullen ende sterken. Ende waer dat zake dat die bisscop voers. enich orloghe beghinnen wilde daer hi onser hulpe toe begherde, des en soude hi niet beghinnen het en ware bi ons^m selfs rade ende bi sinen ghemenen Rade voerscreven; ende so wat wi hem daer in rieden, dat souden wi hem helpen enden na onser macht, als wi sculdich sien te doene, sonder arghelist.

In orkonde etc. Ghegheven tote Haerlemⁿ des dinxendaghes na sinte Gillijns dach int jaer ons Heren M° CCC°^o ende XX.