Registers van de Hollandse grafelijkheid 1299-1345

Graaf Willem III verpacht Jan Hendriksz., rentmeester van Bewesten Schelde, de helft van de 20 gemet tienden te Koudekerke die Jan en Simon, kinderen van Wisse Gillisz., aan Jan hadden verkocht en aan de graaf hadden opgedragen, waarbij Adelise, de weduwe van Wisse, afstand had gedaan van haar lijftocht op deze tienden.

Vgl. de in het register volgende oorkonde nr. ZE 392.

Wi Willaem^a grave van Heynnegouwen^b etc. maken kond etc. Want Jan en Symon Wisse Gillijs^c soens kindere voir ons lyeden dat si vercoft hadden alse verre alst onse wille waer Jan Henrix^d sone, onsen rentemeester van Bewesterscelt^e in Zeelland^f, die helfte van twintich ghemete tienden die zi van ons helden legghende te Kouderkerc^g in Walchren^h, ende zi ons die op droeghen toit zire behoef ende quite scouden, ende want Adeliseⁱ Wissen wedewe, Jans ende Symons^j moeder voirs., hore lijftocht die zi ane den voirseyden tiende hadde voir ons quite scoud toit Jan Henrix^k soens behoef voirs., ende zi hore brieve die zi van ons daer of hadde ons op leverde; zoe hebben wi Jan Henrix^l sone voirs. te gracien ghedaen ende desen tiende verlyet, behouden elken anderen zijns rechts, te houdene ende te besittene in alre manieren alse die brief houd die bi wilcoir van ons ende van onsen mannen van Zeelland^m daer of ghemaect ende bezeghelt es. Ende hier of zal hi ons jaerlix te pachteⁿ gheven achte scellinghe elf penninghe ende enen halling Hollands^o.

In oirkonde etc. Ghegheven in die Haghe dese sonnendaghes na Kersdach int jaer ons Heren XXVI^o.