Registers van de Hollandse grafelijkheid 1299-1345

Graaf Willem III verklaart dat heer Gerard heer van Voorne, burggraaf van Zeeland, en diens zoon Albrecht hem alle inkomsten voortvloeiend uit het burggraafschap hebben opgedragen en voortaan van alle aanspraken dienaangaande zullen afzien, met behoud echter van van hun titel burggraaf van Zeeland, de uitoefening van de rechtspraak, hun leenmannen, tienden en grondbezit in Zeeland en hun rechten op een deel van de jaarbede, waarbij de graaf hun en hun opvolgers de heerlijkheid Voorne en het burggraafschap van Zeeland garandeert als een eeuwig leen; als getuigen treden op heer Jacob bisschop van Zuden en een reeks met name genoemde ridders en knapen, terwijl de oorkonde wordt medebezegeld door heer Jan van Henegouwen, heer van Beaumont.

Vgl. nrs. ZE 512-514, 517, 518, 520, 521, 534 en 539.

Wi Willaem grave van Heyennegouwen^a etc. maken cond allen luden dat onse lieve neven here Gheraerd^b here van Vorne^c, burchgrave van Zeelland^d, ende Alebrecht zone des heren van Vorne voirs. omme meere ruste ende vrienscappe te hebbene med ons ende med onsen nacomelinghen voir hem ende voir horen nacomelinghen heren van Vorne, burchgraven van Zeelland, bi^e rade van horen vrienden ende med goeder voirsienicheden alle verboirnisse, alle vervallen, alle beden hoe mense noemd, ende alle nutscappe in wat manieren dat si verscinen moeghen, die heren Gherarde^f ende Alebrechte voirscreven ende haren nacomelinghen van horen rechte in Zeelland alze van hare burgravescip van Zeelland^g toe behoerden, die emmermeer hier naemaels verscinen moeghen, op ghedraghen hebben ende vertheghen ende vrielike^h quijt ghescouden hebben ons ende toite onser behoef ende onser nacomelinghe ewelike te bliven, ende here Gheraerdⁱ ende Alebrecht^j voirscreven verteghen ende quite ghescouden hebben voir hem ende voir hore nacomelinghe ons ende onsen nacomelinghen van allen achterstellen ende van allen eyske die si ons gheeysket^k hebben jof eysken mochten tote desen daghe toe van horen weghen jof van hore voirvorders die roerden van der burchgravescip van Zeelland, behoudenlic heren Gheraerde^l ende Alebrechte^m voirseyt ende horen nacomelinghen heren vanⁿ Vorne, burchgraven van Zeelland, hare namen van der burchgravesscip van Zeelland ende hore macht recht te hantierne in der burchgravescip voirs. nae der kore van Zeelland; ende soe wat vervalle jof nutscap dat dair of verscinen zal, in wat manieren dat si, dat sal ons ende onsen nacomelinghen allene toe behoren, ende behoudenlic heren Gheraerde^o ende Alebrechte^p voirscreven ende horen nacomelinghen, horen mannen in Zeelland die van hem verlient sien, ende hore tienden ende erven in Zeelland die si nu ter wilen besitten jof namels vercrighen moghen, sonder archlist; ende behoudenlic heren Gheraerd^q ende Alebrecht^r voirs. ende horen nacomelinghen burchgraven van Zeelland hairs rechts van der rechter jaerbede^s in Zeelland alse van den zes penninghen Tournoyse^t sjaers van den ghemete, dair si ende hore nacomelinghe here van Vorne, burchgrave van Zeelland, med horen mannen ende dier uyt verliend sien van hem ane deelen sullen den vierden penninc Beoistersceld^u ende den achten penninc^v Bewestersceld^w. Ende ware dat sake dat wi jof onse nacomelinghe heren Gheraerds^x dienst jof Alebrechts^y voirscreven jof hore nacomelinghen heren van Vorne, burchgraven van Zeelland, begheerden omme onse recht in Zeelland te verwaren jof te te bedriven, dat souden si doen op onsen cost alse weseliken ware. Ende wi bekennen heren Gheraerde^z here van Vorne, burchgrave van Zeelland, dat hi die heerscappie van Vorne ende die burchgravescip van Zeelland, ende sine vorvorders beseten hebben van ons ende van onsen vorvorders, vrielike in gheliken rechte ende in den selven alsoe alse onse vorvoirders tote hier toe ghehouden hebben ende wi nu houden; vort bekennen wi heren Gheraerde^a' voirs. ende sinen nacomelinghe heren van Vorne, burchgraven van Zeelland, die voirnoemde heerscappie van Vorne in den selven rechte ende in gheliken vrieliken sonder enigherhande wedersegghen tote eweliken daghen van ons ende van onsen nacomelinghen payselike in leene te besittene ende med rusten alst voirscreven es. Vort bekennen wi heren Gheraerde^b' voirs. ende sinen nacomelinghen heren van Vorne, burchgraven van Zeelland, die burchgravescip van Zeelland^c' tusken Boirnisse^d' ende Heydene zee^e' van desen daghe voirwards meer ewelike in leene te besitten payselike ende med rusten in den selven rechte ende in den ghelike alst voirscreven es, ende in der manieren van der burchgravescip dat alle vervalle ende alle oirbair die dair of comen mach voirwards meer ons ende onsen nacomelinghen ewelike bliven sullen alsoe alst verclaerset es hier voren in desen selven brieve, ende ons here Gheraerd^f' ende Alebrecht^g' op ghedraghen hebben ende quite ghescouden ende bi desen overeendraghen van der burchgravescip voirs.; en^h' sal die heerscapie^i' van Vorne niet gherord^j' noch ghemindert wesen, sonder archlist.

Hier over waren onse trouwe^k' lude ende manne here Jacob bi der ghenade Goids biscop van Zuden, here Jan van Heynegouwen^l' here van Byaumont^m' onse broder, here Ghizebrecht^n' here van Yselsteyne^o', here Dieric burchgrave van Leyden, maister Jan van Florence^p', here Dieric Bokel, here Hugheman van Zevenberghen^q', here Daniel van der Marwede^r' die jonghe, here Willaem van Naeldwijc^s', here Jan van Pollanen, here Florens van Haemstede^t', here Jan van der Wateringhe^u', here Willaem^v' van Duvoirde^w', ridderen; Jan Persijn^x' van Velsen^y', Jan Persijn^z' die oude, Willaem^a'' van der Word^b'', Mathijs Renghers^c'' sone ende Enghebrecht^d'' van Voirscoten^e'', knapen. ^f'' Ende omme dat wi alle stucken voirscreven vaste ende ghestade houden willen voir ons ende voir onse nacomelinghe, heren Gherarde^g'' ende Alebrechte^h'' voirs. ende horen nacomelinghen heren van Vorne, burchgrave van Zeelland, zoe hebben wi desen brief open bezegheld med onsen zeghele; ende omme die meere zekerhede zoe hebben wi ghebeden heren Janne van Heynnegouwen^i'' here van Byaumont^j'', onsen broeder vorseyt, dat hi^k'' desen brief med ons bezeghelen wille. Ende wi Jan van Heynnegouwen^l'', here van Biaumont^m'', omme bede wille ons lieves heren ende broeders^n'' heren Willaems^o'' grave van Heynnegouwen^p'', van Holland^q'', van Zeelland ende here van Vriesland^r'', ende omme dat wi over alle stucken voirscreven ghewest hebben, zoe hebben wi in kennesse der waride^s'' desen brief ^t'' med hem open bezegheld med onsen seghele.

Ghegheven tote Hairlem des sonnendaghes nae sinte Katherinen dach int jaer ons Heren M° CCC° acht ende twintich^u''.