Registers van de Hollandse grafelijkheid 1299-1345

Graaf Willem III beleent zijn knaap Ricoud van Noordeloos, zijn waard te Dordrecht, met het ambacht Tolloisen, tegen betaling van 400 pond Hollands, terwijl Ricouds nakomelingen bij iedere opvolging 100 pond zullen betalen; voorts stelt hij enkele voorwaarden betreffende Ricouds plichten inzake heervaart alsook vervoer en huisvesting van de graaf en zijn lieden.

De onderstaande tekst is gebaseerd op afschrift B.

Wi Willaem^{a b} etc. maken cont allen luden^c dat wi Rijckoud^d van Nordeloes^e, onsen lieven ende ghetrouwen^f cnape ende onsen wart van Dordrecht^g, ghegheven hebben ende gheven alle dat ambocht van Tolleisen^h met allen den goede datter toe behoert, also goetⁱ alst Ghizebrecht^j van Thelousen^k van ons plach te houdene ende ons^l van hem met allen rechte vorstorven es; ende al dit vorseyde ambocht ende goet zullen Ricoud voernoemt ende sine nacomelinghe hantieren ende bedriven ghilike^m anders ambochts herenⁿ te houdene van ons ende van onsen nacomelinghen, hem ende sinen nacomelinghe tenen rechten erflene. Ende hier omme so heft ons Ricoud voers. in rechten coepe^o ghegheven IIII^C lb. Hollands^p in ghereden penninghe ^q, die hi ons vol ende al betaelt heeft, daer wi ons wel ghepaiet of houden. Noch meer so zullen Ricouds erfnamen, op wien dit ambocht ende goet voers. anecomen zal ende versterven^r na sine doet, ons gheven ende betalen so welke tijt dat sijt ontfanghen sullen van ons ende van onsen nacomelinghen hondert pond Hollands^s, ende also dicke alst voert anecomen sal ende besterven van den ene^t op den anderen van hoirre thoirre ewelike zullen si ons gheven hondert pond Hollands^u telken dat sijt van ^v ons ontfanghen sullen of van onsen nacomelinghen; ende binnen jaers moghen si hoer leen ontfaen sonder versumenne. Vort sullen ons Ricoud ende sine nacomelinghe voeren met enen scepe op die IIII milen van Dordrecht^w so waer wi willen, als wijs hem vermanen; ende ware si langher ute met ons dan enen^x dach, dat soude wezen op onsen cost. Vort so sal Ricoud ende^y sine nacomelinghe metten ambocht van Theloijsen^z ons dienen met enen herecogghe ende met XVII mannen dar binnen dien cogghe voers. op hoer selves cost, so welke tijt dat wi herevard hebben ende die van Zuitholland^a' onse herevard varen; ende lette Ricoud of sinen nacomelinghe sinne, so moghen si setten enen goeden knape in hare stede met ons te varen. Vort so sal Rijcoud voers. ene^b' woninghe ende enen stal tot Tolleysen^c' doen maken up sinen cost tot onser behoef^d', daer wi in sullen comen als wi willen of senden van onsen luden ende van onsen perden alst ons goet dunket, up onsen cost. Ende ware dat zake dat ane Ricoud voirs. of ane sine nacomelinghe eit^e' ghebrake in enighen ^f' van desen zaken voirs., so sullen wijt^g' selve doen doen op horen cost, ende onse hand slaen^h' an al dat ambocht ende goet voers. tot dier wilen dat ons al voldaen^i' ware. Ende hier in so verbint hem Ricoud voirnoemt voer hem ende voer sine nacomelinghe alle dese pointen voers. wel ende ghetrouwelike te houdene sonder archlist; ende wi gheloven in goeder trouwen ^j' vor ons ende vor onse nacomelinghe Ricoud ende sijn nacomelinghe dat voers. ambocht Tolleysen^k' met allen goede datter toe behoerd te waren jeghens elken man, ende^l' onghemoyt daer in te houdene ende hem ende horen luden die in den^m' ambocht wonen niet te veronrechtene noch laten veronrechten vorder dan recht ende vonnesse wiest^n' van den lande, ende hem helpen vorderen ende sterke in haren rechte daer sijs te doen zullen hebben. Ende omme alle dese voers. zaken te houdene ende te volcomene in goeden trouwen, verbinde wi ons ende onse nacomelinghe dat wijt wel ende wittelike houden zullen ewelike sonder ghebrec ende sonder alrehande archlist.

In orconde desen brief bezeghelt met onse zeghele uuthanghende^o'. Ghedaen ende ghegheven^p' tote Caysnoit^q' des saterdaghes voer sente Laurens dach anno Domini M^o CCC^o et^r' XVI^o.