Registers van de Hollandse grafelijkheid 1299-1345

Graaf Willem III geeft Segebrecht, zoon van zijn bottelier Segebrecht Jansz. van Ulvenhout, het eerst vrijkomende schroodambacht in Dordrecht.

Wi Willaem^b grave van Henegouwen^c etc. maken cond etc. dat wi omme menighen dienst dien ons Zebrecht^d Jans zone van Ulvenhoute^e onse botellier ghedaen heeft ende noch doen zal, hebben ghegheven ende gheven met desen brieve Zeghebrecht zinen zone dat eirste scroedambocht dat ons verscinen zal in onser stede van Dordrecht^f na den scroedambochten die wi voir dese tijd met onsen brieven hebben voren wechghegheven ende bewiset, die willen wi dat voren ghaen na dien daghen dat onse brieven dair of ghegheven zien; waer omme wi ombieden onsen scroeders van Dordrecht^g die nu sien of op die tijd wesen zullen alst verscinen zal dat si Zeghebrecht Zeghebrechts zone voirscreven ontfanghen over horen gheselle van onsen scroeders, ten eirsten dat hem verscenen^h zal wesen na dien dat onse brieve ghegheven zien, ende hem laten volghen ende op heffen alsulc verval ende renten als onse anders scroders pleghen te hebben met zulken arbede ende coste als dair toe behoirt.

In oirkonde etc. Ghegheven tote Berghenⁱ in Heneghouwen^j des vridaghes na sinte Lucas dach in jaer ons Heren M CCC XXVI.