Registers van de Hollandse grafelijkheid 1299-1345

Graaf Willem III geeft op verzoek van heer Hugeman van Zevenbergen de inwoners van diens land van Zevenbergen tolvrijdom in Holland en Zeeland, uitgezonderd voor goederen gekocht beneden Keulen en Venlo en voor zout gevoerd voorbij de bovenste tol, en behoudens de voorrechten die eerder aan zijn vrije steden en aan hen zelf waren gegeven.

..Wi^c Willem grave van Heynnegouwen^d etc. maken cont allen luden dat wi omme trouwen dienst ende omme bede willen heren Hughemans van Zevenberghen^e ghegheven hebben ende gheven mit desen brieve sinen luden wonende jof die namails wonen sullen in sinen lande van Zevenberghen, sonder archlist, also verre alst van ons roert, tollen vri te varen met horen goide al onse land doir van Holland^f ende van Zeelland^g, behouden alsulken hantvesten alse onse vorvorders ende wi hier vormaels onsen vrien steden ghegheven hebben, ende behoudelic^h dat si ne gheen goit en sullen coipen op den stroem beneden den hoghesten markenⁱ, dat es Colne ende Venlen, sine sulre tollen of gheven, ende dat si ghien soud opwart voren ^j sullen boven onser operster tollen sine sulre tollen of gheven; ende onse verstantnesse es, hebben si eenighe andre brieve jof betoech van ons jof van onsen ouders^k, sonder archlist, dat die hier mede niet ghecranct en sullen wesen.

Ende omme dat wi willen dat dese dinc vorscreven vast ende seker bliven ghehouden eewelike durende sonder archlist van ons ende van onsen nacomelinghen hem ende sinen nacomelinghen, soe hebben wi desen brief open bezeghelt met onsen zeghele. Ghegheven in die Haghe svridaghes na sente Pieters dach ingaende oechste int jaer ons Heren M^o CCC^o XXXII^o.