Registers van de Hollandse grafelijkheid 1299-1345

Graaf Dirk van Kleef verklaart dat hij graaf Willem III zijn bezittingen in het land van Altena heeft verkocht en dat hij volledig is betaald, en  verzoekt keizer Lodewijk de Beier graaf Willem te bevestigen in die goederen.

Vgl. nr. ZH 438.

Wi Diederic grave van Cleve maken cond etc. dat wi eenen hoeghen manne ende moghenden, onsen lieven neve heren Willame^a graven van Heynnegouwen^{b c} etc., wittelic vercoft hebben die heerlicheden, gherechten, manscip ende goed dat wi ende onse voirders ghehadt hebben ende hebben an den lande van Altena, soe wair ende in wat manieren dat si gheleghen sien, van wilken coepe voirs. ons onse lieve neve die grave voirs. van Heynnegouwen ende van Holland^d vol ende al betailt heeft den eersten penning mit den lesten; wair bi dat wi voir ons ende voir onse nacomelinghe onsen lieven neve den ..grave^e van Heynnegouwen ende van Holland^f voirscreven ende sine nacomelinghe quite ghescouden hebben ende quite scelden mid desen jeghenwoirdighen brieve van den ghelde ende coepe voirscreven, ende hebben opghedraghen ende draghen op die voirs. heerlichede^g, gherechte, manscippe ende goede die wi hadden an den voirs. lande van Altena. Ende hebben ghebeden ende bidden oetmoedichlike eenen hoeghen edelen ende moghende prinche, heren Lodewike keyser van Rome, onsen lieven here, dat wi^h dese voirghenoemde heerlichede, gherechte, manscippe ende goede van den lande van Altena voirscreven of hulde verleenen wille ende confirmeren onsen lieven neve here Willameⁱ grave van Heynnegouwen ende van Holland^j voirs. ende sinen nacomelinghen.

In orkonde hier of etc. Ghegheven te Cleve int jair ons Heren M^o CCC^o XXXII^o des sonnendaghes na sente Martins^k dach in den winter.