Registers van de Hollandse grafelijkheid 1299-1345

Graaf Willem III gelast zijn baljuw en schouten in Amstelland dat zij Meinard de Gruiter beschermen in diens bezit van het huis en land in Amstelveen dat hij heeft gekocht van Floris de Onledige, toentertijd baljuw vanwege bisschop Gwijde van Utrecht, welk goed afkomstig was van Bout van Amstelveen, die schulden had bij Olivier de Lombard.

De onderstaande tekst is gebaseerd op afschrift B.

Wi Willaem^b grave^c van Henegouwen^d etc. maken cond allen luden dat wi verstaen hebben dat Olivier den Lomberder^e gherecht ende ghepant was, als over scout die Bout van Aemstelre vene hem scoudich was an Bouts huze voers. ende ane drie acker lands in Aemstelre vene die Bouts waren, bi Florijs den Onledighen die doe ter wilen van ons liefs heren ons oems weghen heren Ghyen des bisscops van Utrecht^f baeliu was, ende dat Florijs voers. van rechts weghen dat voerseide huys ende goed anenaemde ende lossede tote ons oems behoef als recht was, wilc huys ende land Florijs voernoemd vercoft heeft Meynerde den Gruter^g ende dat ghelt daer of onsen lieven here ende oem den bisscop voers. gherekent, also als ons bi ziere rekeninghe ghetoghet es; waer omme wi onbieden onsen baeliu ende allen onsen scouten van onsen lande van Aemstelle die nu sien jof namaels wesen zullen dat si op dit huys ende land voers. dat Meynaerd^h ghecoftⁱ hevet, als omme der redenen wille voerscreven van den zaken die van Boute roeren, niemant ghien ander recht en doe mar dat si Meynaerd^j voers. ende sinen erfnamen daer in starken ende in houden, alsoe dat zijs vrihelike ghebruken moghen.

In orkonde etc. Ghegheven tote Haerlem^k des dinxendaghes na sinte Bartholemeus^l dach int jaer ons Heren M CCC ende twintich.