Registers van de Hollandse grafelijkheid 1299-1345

Graaf Willem III beleent Simon Nicolaas Trudenz. van Landsmeer met land en een half huis en een halve werf in de parochie van Landsmeer; voorts regelt hij de vererving van dat leen.

Wi Willaem^b grave^c van Henegouwen^d etc. maken cond allen luden dat wi onse vijf deymade een derdendeel van ere deymade min in verDuren weer, ende onse drie deymade een verendeel van ere deymade min in den Coyen, ende een half huys ende een halven weerf die wi met Claise^e Symons sone ghemene hebben, ende onse vier deymade die wi met Claise^f voers. ghemene hebben int weer daer die woninghe voerscreven op staet in den norderen ec van den were, wilc land al leghet in die prochi^g van Lancsmaer in Waterland^h, verlietⁱ hebben ende verlien Symoen^j Clais^k Truden sone van Lancsmaer van ons te liene te houden in manieren dat na siere doet comen zal op Heynen ende Claise^l sinen twien outsten sonen die hi nu heeft evenghelike te delen, ende storve die ene van den twien sonder wittachtighen soen so sout die ander al van ons ontfaen, ende daer tenden binnen afterzuster kint niet te versterven, est wijf est man van wittachtigher boerd, ende ymmer op den naesten te comen, ende te comen op den jongheren man voer touder wijf daer si beide evenna^m sien.

In orkonde etc. Ghegheven in die Haghe vriedaghes voer sinte Jans daghe te midde zomer int jaer ons Heren M CCC zes ende twintich.