Registers van de Hollandse grafelijkheid 1299-1345

Graaf Willem III schenkt zijn kamerling Willem heer Filipsz. van Duivenvoorde een erfrente 200 pond jaarlijks, in munt zoals dat in Brabant gangbaar is, welke rente Willem had gelost van Jan Winke van Brussel en hij ieder jaar als eerste mag innen uit de tol van Mechelen en de andere goederen die aldaar de graaf zullen toevallen van heer Floris Berthout, en zegt toe dat bij eventuele hinder in de betaling Willem een boete mag heffen van 25 schelling per 100 pond per dag, alles onder verband van al zijn goederen; de oorkonde wordt meebezegeld door heer Eustaas heer van Roeulx en heer Gerard van Pottes, ridders, die getuige waren van de rechtshandeling.

De bovenstaande datering is gebaseerd op de veronderstelling dat de paasstijl is toegepast. Zie de Inleiding.

De onderstaande tekst is gebaseerd op afschrift B.

Wi Willaem^a grave^b van Heynnegouwen^c, van Holland^d etc. maken^e cond allen luden dat wi alsoe verre als Machlen^f ende dat goet dat dair toe behoirt, also groet alst hair Florens^g Bartoud here van Machlen, onse neve, nu besittet ende ons van hem ane comen mach, anecomet ende ons^h blivet, dats Reynoud ⁱ van Ghelre, onse neve, niet jeghens ons en losset, ghegheven hebben ende gheven erflike Willame^j heren Phillips^k sone van Duvenvoirde, onsen ghetrouwen camerlinc, ende sinen nacomelinghen, om menighen trouwen dienst dien hi ons ghedaen hevet ende noch doen zal, twie hondert pond sjaers payments alsulcs als ghemeenlike ghenghe es in borsen te Lovene, te Broesele^l, toet Antwerpen ende in anders des hertoghen stede in Brabant, die Jan Winke, poirter te Broesele^m, tote sinen live voirmaels jeghens Gilijsⁿ Bartoud gecoft hadde ende Willaem^o voirs. jeghens Jan Winken ghelosset hevet. Wilke twie hondert pond sjaers voirs. wi beloven Willame^{p q} ende sinen nacomelinghen jof den ghenen die desen brief toghet te betalen jaerlix op den Kersdach^r, ende wi bewisense ende besettense hem jaerlix op te heffen ende tonfanghen op onse tollen te Machelen^s ende op al onse goet dat ons aldair van heren Florense^t voirs. op comen mach, in deser manieren dat wi van onser tollen ende goede voirscreven niet ontfanghen en zullen voir dat Willaem^u voirs. of sine nachomelinghe jof die houder es des briefs sullen hebben^v ontfanghen jaerlix die twie hondert pond, payments voirscreven, ten termine voirseyd, also dat Willame^w ende sine nacomelinghe ^x of die houdere des briefs emmer die eerste zullen wesen in den ontfanghen jaerlix van onser tollen ende goede voirs., tot der tijd toe dat si die twie hondert pond sjaers voirscreven te vollen ontfanghen zullen hebben; ende waer dat zake dat Willame^y jof sine nacomelinghe of die houder es des briefs voirseyd yet ghebraken in der^z betalinghe van desen twie hondert ponden sjaers ten termine voirnoemd, jof dat si bi onsen verbieden of laten of bi onsen ghebode jof anders iemans van onsen weghen hier in ghelet worde, zo dat si die twie hondert pond sjaers jaerlix niet op heffen en mochten alst voirscreven es, zo gheloven wi hem in goeden trouwen te gheven ende te betailen elkes daghes van elken hondert van den twie hondert ponden voirscreven vijf ende twintich scellinghe, payments voirs., sonder te minneren die summe van den hoeftghelde voirscreven. Ende toet allen desen stucken voirscreven Willame^a' ende sinen nacomelinghen volcomelike ende vaste te houden erflike so verbinden wi ons ende onse nacomelinghe. Voirt so willen wi ende concenteren^b' bi onsen wille openbaerlike: waer dat wi Willaem^c' jof sinen nacomelinghen of den houder des briefs ghebraken inder^d' betailinghe van den twien hondert ponden sjaers voirscreven jof in enighe punte van desen voirwaerden voirscreven, dat si moghen bi wilcore van ons ende sonder onse moynesse onse goet, so waer dattat^e' ghewonnen woert, arresteren ende houden toter tijd toe dat hem van den twien hondert ponden erflike sjaers te vollen betailt sie ende hem van allen voirwaerden voirscreven gheheelike ende al ^f' sien voldaen.

Hier over waren onse ghetrouwe manne, ridders^g' here Eustaes here van den Rues ende here Gherard^h' van Pottes, die wilke mit ons ter oirkonden dese lettere mit ons open bezeghelt hebben mit horen zeghelen bi den onsen. Ghegheven des zonnendaghes voer sinte Agnieten^i' dach int jaer ons Heren M CCC° ende twintich.