Registers van de Hollandse grafelijkheid 1299-1345

Hertog Jan III van Brabant verklaart dat hij met graaf (Willem III) een voorlopige regeling heeft getroffen betreffende het hoge gerecht van de ambachten van Jan van Drongelen waarop Jan van Heusden aanspraak maakt, en dat hij met de graaf is overeengekomen dat zij en hun medestanders een verzoening van hun twist en de daarin geleden schade zullen verblijven aan de uitspraak van heer Floris Berthout heer van Mechelen, heer Gerard heer van Voorne, burggraaf van Zeeland, heer Jan heer van Arkel en heer Rogier van Leefdaal, ridders, met de bepaling dat dit college in geval van onenigheid een vijfde scheidsman zal aanstellen, wiens stem de doorslag zal geven.

Vgl. nr. BR 12, alwaar wordt gemeld dat de onderhavige oorkonde was bezegeld met het grootzegel van de hertog, alsmede nr. BR 13.

De onderstaande tekst is gebaseerd op afschrift B.

Wi Jan bi der gracien Gods hertoghe van Lothringhe^a, van Brabant ende van Limburch^b maken cond allen luden dat wi met enen edelen ende moghenden man, onsen lieve neve den grave van Heynnegouwen^c, van Holland^d, van Zeeland^e en here van Vriesland, van den hoghen gherechten van den ambochten die Jan van Dronghelen besit ende Jan van Hoysdene^f segghen^g dat hem toe behoren soude, over een ghedraghen sien als wat^h die here van Ercleⁱ die hoghe gherechten van den ambochten voirs. in sinen handen hebben zal ende besitten van beyden partien weghen, tote dier tijd dat besceyden es wie dat hoghe gherechten van hem twien metten rechte van ons houden zal. Voirt zal ons die grave van Heynnegouwen voirseyd onsen scade die ons zelven ghesciet es ane onsen properen goede, ende die scade die onse poirteren van den Bosche  ende onsen mannen ende onsen lieden die sine viande niet en sien, ghelden also groet als edelen luden heren Florens^j Bartout^k here van Machlen, heren Gherard^l here van Voirne, borchgrave van Zeeland^m, heren Janne here van Erkelⁿ ende Rogier van Levedale, riddere, ter waerheyden vinden selen ende groten dat ons ghesciet es van sinen luden die hi ghesent hadde omme siere^o viande mede te krenkene, ende dair of zal hi bi desen vieren ghemenen acoirde voirscreven ons ghelden ocht onse ghemoede hebben voir alle dinc; ende des ghelike zullen wi den grave van Heynnegouwen voirs. voir alle dinc sine scade ghelden ocht sine ghemoede die hem ghesciet^p es an sinen propren goede van sinen ouderen toe comende bi desen vieren voirscreven, in alre manieren hi dat onsen scade ghelden zal. Voirt sien wi van allen tuyste, broeke ende eyske die die grave van Heynnegouwen voirs. ende sinen hulperen ons ende onsen hulperen eyskende sien, ende wi ende onse hulpere hem weder, van den oirloghe van Hoysdene^q ende dat dair of roerde ende ghesciet sien toit op den dach van huden, ende van allen twiste, broke ende eyske die die grave van Heynnegouwen^r ende sinen helperen ende die van den Broke^s eyskende sien Janne van Hoysdene^t, ende dat dair of roerde ende ghesciet^u sien toit op den dach van huden, ende van allen tuyste^v, broeke ende eyske die die grave van Heynnegouwen^w ende sine helperen ende die vanden Broeke eyskende sien Janne van Hoysdenne , Janne^x van den Elshoute ende horen hulperen^y, ende si hem weder van allen twiste, broeke ende eyske die hair Jan van der Dusen, ridder, Jan van Dronghele, Jan van Wiskel, Heynric^z Marien sone, Tielman die Moylnaer^a' ende hoir helperen eyskende sijn Janne van Hoysdenne , Janne van Elshoute ende horen helperen, ende si hem weder, uyt ghenomen den here van^b' Zaffenberghe^c' die hem zelven uyt gheset hevet, ghebleven sien an den^d' here van Machlen ende den here van Voirne, den here van Arkel^e' ende ane heren Rogire^f' van Levedale voirs.; ende so wad dese viere voirs. ghemeenlike over een draghen ende met ghemenen acoirde zullen segghen van den oirloghe voirs., dat gheloven wi voir ons ende voir onse helperen, vor Janne van Hoysdenne , Janne van Elshoute ende horen helperen, ghetrouweliken te houden ende te doen houdene. Ende waer dat zake dat dese vier segheren voirs. in enighen ponte discordeirden, so souden si eer si enich segghen seyden van den oirloghe voirs. enen over man nemen^g' bi ghemenen acoirde, ende die hem allen vieren ghenoechde; ende met wilken horen twien van den vieren voirs. dat die over man mede over een droghe alse van den ponte dair si omme discoirdeirden, dat soude ghestade bliven. Ende omme dat wi ene ghestade soene hebben willen, so hebben wi gheloeft hoir segghen te houden, oec so wat si segghen van den oirloghe voirs.; daden wijs niet, wi souden den grave van Heynnegouwen voirs. gheven tien^h' dusent pond Tornoyse^i', den groeten voir sestien penninghe gherekent. Ende hier bi zel die grave van Heynnegouwen ende sine helperen voirs. ende wi ende onse helperen onderlinghe ghesoent sien, ende die partien ende hore helperen onderlinghe ghesoent sien, ende Jan van Hoisdenne ende Jan van den^j' Elshoute ende hore helperen^k' jeghen den grave^l' van Heynnegouwen ende die van den Broeke versoent sijn, ende hair Jan van der Dussen, Jan van Dronghele, Jan van Wiskel, Heynric^m' Marien sone, Tielman die Moilnaer^n' ende hoir helperen jeghens ons versoent sien, ende alle die ghene die ter oirloghen voirs. behoren^o' ende hore helperen van allen syden; ende die in dese soene versoent sien als voirscreven es, die zullen hoirs goeds vriliken ghebruken ghelike dat si daden eer dit oirloghe voirs. beghonde. Ende waer dat sake dat van desen vier seggheren voirs. enich storve ocht kenlijc moede sake^p' hadde, so souden wi van onser siden waer dat hi ons dair ghebrake, ocht die grave van Heynnegouwen van siere siden waer dat hi ghebrake, enen anderen in sinen stede setten; ende alle dese stucken^q' te doene sonder archlist.

In kennesse der waerheyt hebben wi dese letteren bezeghelt met onsen zeghele. Die waren ghescreven int^r' jaer ons Heren als men scrift M CCC^o ende XXI^o des dinxendaghe voir sinte^s' Lucus^t' dach ewangelisten.