Registers van de Hollandse grafelijkheid 1299-1345

Graaf Willem III verleent heer Nicolaas, proost van het klooster van Hemelum in Friesland, het recht de monniken in de uithof in het baljuwschap Medemblik te berechten, waarbij de baljuw hem behulpzaam zal zijn.

De onderstaande tekst is gebaseerd op afschrift B.

Wi Willaem^a grave^b van Henegouwen^c etc. maken cond allen luden dat wi onsen lieven vreent heren Niclays^d, proest van den cloestre van Hemlem^e in Oestvriesland, die houder es van desen brieve, macht ghegheven hebben ende gheven te rechtene over sine monike die wonen in sinen hove in Westvriesland in der baellienscap^f van Medenbleke^g, in alsulker manieren alse hier na ghescreven staet, dat es te wetene dat haer Niclais^h proest voers. sal twiewarven comen des jaers in West Vrieslandⁱ in sinen hove omme sine monike te corrigierene, dat sal wesen te Pinxteren ende tote Bamisse^j, ende alle die ghene die hem te beclaghene hebben van sine moniken van scouden jof van anderen zaken, die zullen voer den proest comen ende sullen hem toghen hore lettere, ende hi sal hem al recht ende al^k bescheyt doen bi rade van onsen baeliu van Medenbleke^l; ende willen dat die moneken van allen den hoven van Hemlem in West Vriesland^m niement onderhorich sien dan horen proest voers., want hise in sine beschermenesse heeft, behouden onser heerlicheit. Ende ware iemende van den moneken voernoemt die den proest voers. niet obedientⁿ ende hoerzamich^o wesen woude, so onbieden wi onsen baeliu van Medenblike^p die nu is jof hier na wesen sal, ende den goeden luden van der baeliuscap, dat si heren Niclais^q proest voers. ghehulpich sijn die moneken te bedwingene^r ende te corregierene, ende hem in sine rechte vorderlich ende ghehulpich sijn, jof hijs te doene heeft. Dit sal gheduren tot onsen wedersegghen.

In orkonde desen brieve bezeghelt met onsen zeghele^s. Ghegheven te Haerlem^t des donresdaghes na sinte Baven daghe int jaer ons Heren M CCC ende XVII.