Registers van de Hollandse grafelijkheid 1299-1345

Graaf Willem III verbiedt de goede lieden van Wieringen nog langer geschenken te geven aan de ambtsdragers aldaar.

De onderstaande tekst is gebaseerd op afschrift B.

Wi Willaem^a grave^b van Heynnegouwen^c, van Holland^d etc. maken cond allen luden: want wi verstaen hebben dat onse goede lude van Wieringherland verladen sien mid den ghiften die si onsen ambochts luden van Wieringherland te gheven pleghen, dat hem te suaer es, ende wi niet ghedoghen^e en willen, zo onbieden wi onsen goeden luden van Wieringherland^f voirs. ende willen dat si ghene ghifte en gheven onsen bailiu, noch onsen rentemeester, noch onsen scoute van Wieringherland, die de ghemeente ghelden sal. Ende waer dat sake dat si enighe ghifte ghaven hier boven onsen ambochts luden voirseyd, zo verboirde elc man van Wieringherland voirscreven tyeghens ons tien pond Hollands^g.

Ende omme dat wi dit vaste ende ghestade willen houden ende ghebieden te houden onsen goeden luden van Wieringherland voirs., so hebben wi desen brief beseghelt mit onsen seghel. Ghegheven ende ghedaen in die Haghe op den meyeavond int jaer ons Heren M CCC twee ende twintich.