Registers van de Hollandse grafelijkheid 1299-1345

Graaf Willem III en de grietmannen van Westergo, van Franekeradeel, Wonseradeel, Wijmbritseradeel, Harich en Hemelum, en de mederechters en het gemene land van Westergo beëindigen hun onderlinge strijd met een zoen, waarin tevens wordt vastgesteld hoe aan de graaf genoegdoening zal worden gegeven vanwege het verdrijven van de schout van Staveren en het verwoesten van huizen van poorters aldaar, welke huizen hersteld zullen worden; de overige wederzijds toegebrachte schade wordt kwijtgescholden.

Vgl. de hiermee samenhangende oorkonden in het register, nrs. FR 106 en 107.

Wi Willaem^b grave van Heynnegouwen^c, van Holland, van Zeelland^d ende here van Vriesland^e, ende wi grietmanne van den ghemeenen lande van Westergoe^f, van Vroenacker, Wildinghe, Waghenbrughen, Harich ende van Hemlum, ende alle die mede rechters ende alle die ghemeente van den ghemeenen lande van Westergoe^g maken cond allen luden dat wi van sulken twiste alse wi tote desen daghe toe onderlanghe ghehad hebben alse van dien dat wi grietmanne ende ghemeene land van Westergoe^h voirs. verdreven des sgravenⁱ scoute voirs. uyt siere poirte van Staveren^j ende braken siere poirteren huysen binnen ziere poirte van Staveren^k, alze Otten heren Hessels soens, Ludekijns heren Zybouds^l soens, Poppeken Ysebrands^m soens ende Volkairdⁿ Taverniers, ende van allen brande, roeve, ghevanghene, scade ende werre aen beyden zyden die dair of gheroert zien tote desen daghe toe, over een ghedraghen zijn ende witteliken versoent in manieren alze hier nae volghet.

In den eersten zullen wi aen beyden zyden ghestade houden alsulke zoene alze twisken ons ghemaket was toit Alkemair^o, ende die brieve dair of houden. Voird alsulke broeke ende scade alse wi grietmanne ende ghemeene land van Westergoe^p ghedaen hebben in^q sgraven poirte van Staveren^r voirs. van sinen scouten die verdreven sijn, huyze ghebroken ende weder te maken, bi zegghen des biscops van Zuyden^s, des abts van Staveren^t, des lezemeisters van Boedelswairde^u ende heren Pieters des dekens van Meerden, sullen die van Staveren^v voir ons beteren ende quiten op des graven zegghen voirseit ende des biscops van Zuyden^w, twisken dusent marc ende twien dusent marc Enghelche, die marc over viertich groter Tournoyse^x gherekend; want die van Staveren^y mid ons oerlogheden jeghens den grave ende gheloveden ons tontheffen jeghens hem van der broeke die wi daden aen sinen scoute te verdrivene ende aen sine poirter huyse tebrekene binnen Staveren^z voirscreven. Ende wi Willaem^a' grave van Heynnegouwen^b' ende van Holland^c' voirscreven laten ons wel ghenoeghen van den grietmanne ende van den ghemeenen lande van Westergoe mid alsulker beteringhe als ons onse poirte^d' van Staveren^e' doen zal van horen weghen, ende sceldenze quite. Voird alle brand, roef, vanghenesse, scade ende werre die tote desen daghe toe ghescied sijn ane beyden syden quite, ende dair of die ene den anderen niemermeer niet te eyschene.

Ende omme dat wi ane beyden zyden ende onse nacomelinghe dese soene wittelike ende trouwelike houden zullen, zoe hebben wi desen brief open bezegheld mid onsen zeghelen. Ghegheven toit Alkemair^f' op sinte Margrieten dach int jaer ons Heren dusent drie hondert acht ende twintich.