Registers van de Hollandse grafelijkheid 1299-1345

Graaf Willem III doet uitspraak in een geschil tussen de burgers van Staveren en Hendrik Langeside, burger van Lübeck of Riga, wiens goederen zij geconfisqueerd hadden.

Vgl. in dit register nr. FR 125 alsmede de nrs. FR 136 en 138-140.

Wi Willaem^a grave^b etc. maken cond allen luden. Want in den oirloghe dat onse stede van Staveren^c ghehad heeft jeghens die stede van Lubeke onse burghers van Staveren^d voirs. Henrics^e Langheside^f goet op ghehouden hebben, ende segghen dat hi es burgher te Lubeke ende dat dat goed dat si hem ghenomen hebben toe behoirt burghers van Lubeke, ende hi seghet dat hi burgher es te Righe ende niet te Lubeke, ende dat dat goed dat si hem ghenomen hebben sijn es ende niement toe en behoirt van Lubeke; des si van beyden ziden an ons ghebleven sijn, dair onse stede van Staveren^g ons of seker ghedaen heeft met hoiren open brieven, ende Henric Langheside voir hem ende sine hulpere ons borghen gheset heeft op ene pene van viertich ponden groeten, onse segghen dair op^h te houden, wair of wi wel beraden onse segghen uten. In den eersten segghen wi dat Henric Langheside open brieve brenghen sal van der stede van Righe, daer die Raed ende die raedmeysters bi hoiren eede in kennen dat Henric Langheside voirs. op die tijd doe hem die van Staverenⁱ sijn goed namen ende op helden burgher was te Righe ende ghien burgher en was te Lubeke, ende dat dat goed dat hem die van Staveren^j namen niet toe en behoirde dien van Lubeke ende dat dat goed sine was, jof scriven van stucke te stucke in hoiren brieve wat goede dat is dat si namen ende wes dat het es van Righe: steken si yet buten, dat sullen die van Staveren^k onder behouden; est dier van Lubeke, soe salt dien van Staveren^l bliven; est van anderen steden, soe sullen siere mede doen onse goeddencken. Ende Henric voirs. sal overveede doen ende die stede ende die burghere van Staveren^m ende hoire hulpere quite scelden mit der stat opene brieve van Righe, ende hier bi sal men Henric Langhesideⁿ voirscreven sijn goed weder gheven alsoe groet alse die stat van Righe kennen sal, alsoe verre alst onder die van Staveren^o alsoe groet ghecomen es. Est dat sier omme twien dat soe groet niet en es, dair sullen die scoute ende die ghemeene scepene ende Raed van Staveren^p bi hoiren eede ende mit hoiren openen brieve voren staen dats onder hem noch onder eenich van hoiren burgheren jof^q hulperen noch in hoire steden oirbair niet meer ghecomen en es; steken si yet buten, dat sullen si hem ghelden. Voirt ware yemend van der eere zide jof van der ander die hier archlist in besighede jof eenich goed onder behelde jof van steden brochte mit sinen eede dat sijn niet en ware, die soude ons dat verbeteren toit ons selves goeddencken. Ende hier bi segghen wi eene alinghe soene tuschen den partyen ende van allen stucken voirscreven, op die pene voirnoemt; ende soe wat sonderlinghe persone die soene brake, die verbuerde sijn lijf, ende dat soude staen toit onser^r proeven mit wien wi wilden. Ende wair die persone van Staveren^s die ons dochte dat die soene te broken hadde, dat souden wi over scriven onser stede van Staveren^t ende die souder over rechten op die pene voirscreven; brakese Henric Langheside voirscreven jof sine hulperen, dair souden sine borghen over doen rechten op die pene voirscreven. Ende alle stucken voirscreven sonder archlist.

In orconde desen brieve beseghelt met onsen zeghel^u. Ghegheven op sente Lucas dach ewangelisten int jaer ons Heren dusend driehondert drie ende dertich.