Registers van de Hollandse grafelijkheid 1299-1345

Graaf Willem III schenkt Wouter van Rolland 36 made land bij Heemstede in vrij eigendom, behalve de 4 made die Sofia Paridaansdr. gedurende haar leven in lijftocht heeft en die eerst na haar dood aan Wouter zullen komen.

De onderstaande tekst is gebaseerd op afschrift B.

Wi Willaem^a grave van Henegouwen^b etc. maken cond etc. dat wi ghegheven hebben ende gheven Wouter van Rolland^c te vrien eyghen zes ende dertich maden lands luttel meer jof min, legghende tote Heemstede^d ende ons ane quamen van Florekijn Jans soens doet, diese van ons helt te rechten lene, behouden Sophien^e Paridaens^f dochter viere maden lands die si daer uyt hout te lijftochte alse langhe als si levet, ende die gheven wi Woutere voers. na hare doet, want si den lande voernoemd toe behoren; ende dit land voerscreven gheloven wi hem te waren, jof den ghenen die houder es van desen brieve, te vrien eyghen jeghens elken man. Ende waer dat sake dat yemant dat land voernoemd jeghens Woutere^g voers. cofte, dien zullen wijs warant wesen in allen manieren alst voerscreven es.

In orkonde desen brieve etc. Ghegheven in den Haghe des vridaghes na onser Vrouwen dach in septembre int jaer ons Heren M CCC ende twintich.