Registers van de Hollandse grafelijkheid 1299-1345

Graaf Willem III doet uitspraak in een geschil tussen enerzijds vrouwe Beatrijs Willemsdr. van Haarlem, vrouwe van Heemskerk, en haar kinderen bij Jan Mulard, en anderzijds jonkvrouw Goede Jansdr. van Bergen, over de goederen van Willem van Haarlem die in het bezit waren van wijlen Jan van Bergen.

De onderstaande tekst is gebaseerd op afschrift B.

Wi Willaem grave^d van Heynnegouwen^e etc. maken cond etc.^f dat van allen eyske ende saken van liengode jof eyghen die ver Beatrice^g Willaems^h dochter van Hairlemⁱ, vrouwe van Haemskerke^j, ende hoir kinder die si bi heren Janne Mulairde hevet, eyskende waren jof mochten joncfrou Goeden Jans dochter van Berghen, roerende van den goede van Willaem^k van Hairlem^l dat Jan van Berghen besat, daer God die ziele of hebben moet, die an ons van beyden partien al ende gheheelijc ghebleven sien, waer op wi wel versien mit onsen Rade hebben gheseyd onse segghen daer of in deser manieren: dat joncfrou Goede voirs. vri ende quite wesen sal van alrehande ane talinghen, eysche ende moyenesse die ver Byatrijs^m ende hoir kinder voirscreven hoir eyschen moghen van den goede voirscreven, erstⁿ van leengode jof anders. Ende daer bi sal joncfrou Goede voirs. bi Jan Persijn^o sheren Jan Persijns^p sone ende Floris^q van Adrichem bewisen ^r veren Beatrise^s ende haren kinderen voirseyd ^t hondert pond Hollands^u op dat eyghen erve legghende tote Hoghedorp, dat Willaems^v van Hairlem^w was, in dere manieren: so wanneer joncfrou Goede voirseyd te manne ghecomen es, dat si binnen dien selven jare dit voirseyde erve lossen mach vri ende quite mit hondert pond Hollands^x; ende waer dat sake dat sise niet en lossede alse voirs. es binnen den voirs. jare, so soude dit goed ende erve also groet alst hem bewijst ware over die hondert pond bi Janne ende Florise voirscreven eweliken bliven veren Beatrise^y ende haren kinderen voirs., ghelike anders haren eyghen goede.

Om dat wi willen dat dit vast ende ghestade blive, so hebben wi desen brief doen beseghelen mit onsen seghele. Ghegheven in die Haghe des donresdaghes na Meyedach int jaer ons Heren M CCC twee ende twintich.