Registers van de Hollandse grafelijkheid 1299-1345

Graaf Willem III bevestigt de regelingen getroffen door de commissie inzake de achterstallige betalingen aan Willem vrouw Baartenz. en gelast de baljuw en de rentmeester van Kennemerland en West-Friesland onverwijld voort te gaan met de afhandeling van de zaak.

Vgl. de voorafgaande oorkonde nr. KE 52 in het register, alsmede nr. KE 61.

De onderstaande tekst is gebaseerd op afschrift B.

Wi Willaem grave^a van Heynnegouwen^b etc. maken cond allen luden dat wi onse lieve ende ghetrouwe lude den biscop van Zuden, heren Gheraerde^c van Raporst, heren Symon van Benthem, heren Daniel van der Merewede^d, ridderen, Janne van Polanen^e, Enghebrecht^f van Voerscoten^g onsen rentemester van Noirtholland^h, Janne den Keyser onsen rentemester van Kennemairlandⁱ ende van Vriesland, die scepene van onsen steden van Hairlem, van Delf, van Leyden, ende Gheraerde^j Alewijns sone ute Leyden ghesend hadden tote Egmonde omme te verclaersen alsulke scout als Willaem^k veren Bairten sone ons tafter ghelevert hadde op onse goede lude van onsen lande, ende dair op een ende te maken, wie ons dat afterstal van rechte sculdich soude wesen te ghelden. Ende want hem die stucken so groet dochten dat sise bi hem selven niet enden en mochten noch en wilden, so droghen si ghemeenlike over een ende screven in enen open brieve mit hare alre seghelen beseghelt, ende dair dese brief dore gesteken es, wad hem recht ende redelijc dochte die stucken voirscreven mede te enden, ende screven oec ons in enen besloten brief worde ende wederworde ende betoch mit brieve ende mit monde die si an beyden siden ghehoird hadden, ende senden ons oec mede die rollen van den achterstalle ende elcs mans antwoirde bescreven die antwoirde dede; ende begherden dat wier ons op alle stucken voirscreven versien wilden ende dair in doen dat ^l ons ende onsen Rade van Heynnegouwen^m beste ende weselijc dochte. Waer op wi onse lude van onsen Rade vermaenden hem dair op te versiene, ende sien mit goeder voersienichede over een ghedraghen dat ons best ende weselijc denket dat men voirtvaer also alse die brief spreket dair dese dore ghesteken es; ende ombieden u heren Daniel van der Merewedeⁿ onsen bailiu ende Janne den Keyser onsen rentemester van Kennemairland^o ende van Vriesland dat ghi sonder vertrecken mit den stucken voirtvaird ende een ende dair of maket. Ende wad ghi hier toe doit na den brieve dair dese dore ghesteken es, dat sullen wi vaste ende ghestade houden.

Ghegheven tote Berghen in Heynnegouwen^p des manendaghes voer sente Michiels dach int jaer ons Heren M CCC^o twe ende twintich.