Registers van de Hollandse grafelijkheid 1299-1345

Jacob bisschop van Zuden, Dirk abt van Egmond, een aantal met name genoemde edelen, de baljuw en de rentmeester van Kennemerland en West-Friesland, de rentmeester van Noordholland, schepenen van Haarlem, Delft en Leiden en Gerard Alewijnsz. stellen in opdracht van graaf (Willem III) een regeling vast met betrekking tot de achterstallige gelden van de ingezetenen van Alkmaar, Haarlem, Kennemerland, West-Friesland en elders jegens (de voormalige rentmeester) Willem vrouw Baartenz.

Vgl. de volgende oorkonde nr. KE 53 in het register, alsmede nr. KE 61.

De onderstaande tekst is gebaseerd op afschrift B.

Wi ^a Jacob bi der ghenaden Gods biscop van Zuden, Dieric^b bi der selver ghenaden abt van Egmonde, Gherid^c van Raporst, Symon van Benthem^d, Daniel van der Merewede^e bailiu van Kennemairland^f ende van Vriesland^g, ridderen, Jan van Polanen^h, Enghebrechtⁱ rentemester van Noirtholland^j, Jan die Keyser rentemester van Kennemairland^k ende van Vriesland, knapen, Jan van der Scure, Alebrecht^l Wouters sone ende Jan Aelbrechts^m sone, scepen in Hairlem, Willaemⁿ van den Velde ende Gherijd^o die Starke, scepen in Delf, meester Andries ende Pieter Cokenaydse^p, scepen in Leyden, ende Gherijd^q Alewijns sone, van ons heren sgraven weghen ghesent toit Egmonde omme te verclaersen dat achterstal dat Willaem^r veren Bairten sone ghelevert hevet op die goede lude van Alkemare, van Hairlem^s, van Kennemairland^t, van Vriesland ende elwair van ons heren sgraven lande, ende dat te besceyden mit den besten rechte wie dat sculdich es te ghelden na Willaems^u worden ende betoch ende der goeder lude betoch ende worde voirscreven; maken cond allen luden dat wi alle ghemeenlike over een ghedraghen sien dat ons beter recht denket, na worde ende na wederworde ende na betoghe mit brieven ende mit monde, dat elc wittich^v man die onberuft es van quaden faite ende binnen vriheden wonet ende poirter es toit Alkemair, te Hairlem, te Medenblic jof elwair, van achterstal dat veroud es ende men hem eyschet, ende dair of binnen jare ende daghe onvermaend es bliven na den lesten daghe dat hijt sculdich soude hebben gheweset, dat hi sine onscoude dair of doe dairt Willaem^w voirs. of anders yemant van Willaems^x weghen op hem starken soude. Voert denket ons recht wesen dat alsulke scoud ende achterstal als men Willaem^y voirnoemd sculdich was van ons heren sgraven weghen voirs. die wile dat Hannekijn^z Ynkart^a' sijn clerc was tote dier tijd toe dat hine van hem dede, zo wad Hannekijn liet dat hi binnen dier tijd voirs. dair of ontfenc, dat dair mede die lude van den lande bewart bliven, want hem Willaem^b' ghelovede ende sine stucken bevolen hadde. Voert denket ons redeliken wesen dat hair Daniel van der Merewede^c', bailiu, ende Jan die Keyser, rentemester van Kennemairland^d' ende van Vriesland voirs., ene waerheyde ondersoeken van elken manne die int tachterstal staet ende buten vriheden wonet, es hi wel gheboren jof huysman; ende wad si vinden claerliken mitter warheyden verghouden, dat sal quite ende verghouden bliven. Ende so wad si ter waerheyden niet en vinden verghouden op enen wel gheboren man, die man sal voren sueren ende twe welgheboren manne na mit hem dat hi diere scult onsculdich es ende al betaild hevet den rentemester Willaem^e' voirs. of sinen ghewarden boden, ende dair mede sal hi quite wesen. Ende so wad si ter warheyden niet en vinden verghouden op enen huysman, die man sal voren sueren ende ses manne na mit hem dat hi der sculd onsculdich es ende al betaild hevet Willaem^f' voirs. jof sinen ghewarden boden, ende dair mede sal hi quite wesen. Ende so wie mit den anderen sullen sueren, die ne sullen van dier scoud dair si omme sueren noch winres noch verlieser wesen.

Ende omme dat wi des ghemeenliken over een ghedraghen sien, zo hebben wi alle ghemeenlike desen brief beseghelt mit onser alre seghel. Ghegheven toit Egmonde des dinxendaghes na onser Vrouwen dach in september int jaer ons Heren M^o CCC^o twe ende twintich.