Registers van de Hollandse grafelijkheid 1299-1345

Graaf Willem III bepaalt dat de schepenen van Heiloo, Oesdom en Assendelft, die in Zierikzee in gijzeling hadden gelegen vanwege de door hen en die drie dorpen gezamenlijk jegens hem gepleegde misdrijven, een boete van 1.200 pond Hollands moeten betalen, op te brengen in twee termijnen.

Zie ook de volgende oorkonde nr. KE 80 in het register.

Wi Willem^a grave etc. maken cont allen luden dat onse lude de scepen van Heyliloe, die scepen van Oesdam ende de scepen van Aspendelf, die wi tote Zirixe gheghiselt hadden vor hem ende vor onse ghemeente van Heyliloe, van Oesdam ende van Aspendelf vorscreven, jeghens ons verdinghet hebbet^b van alre broke ende misdaet die onse scepen ende ghemeente van desen drien dorpen vorscreven met ghemenen overeendraghen jeghens ons misdaen hebben tote desen daghe toe, omme twalf hondert pond Hollands^c, den groten over achte penninghe gherekent, te betalen die ene helfte tote Bamisse naest comende^d ende die ander helfte tote Paeschen daer nae naest comende^e ons jof den ghenen die dan onse rentemeester es van Kenemaerland^f ende van Vriesland^g. Mar waer dat zake dat van onsen luden vorscreven yement ware diemen anesprake van boten^h die hi sonderlanghe verboert hadde vor dese tijt, dien soudmen daer recht doen sonder vertrecken, ende die souden ghelden alse vele als hem daer of vontnesse wijsde, sonder arghenlist.

In orconde etc. Ghegheven tote Zirixe des donresdaghes vor sente Symon ende Juden dach int jaer van XXIIII^o.