Registers van de Hollandse grafelijkheid 1299-1345

Graaf Willem III beleent Jan van Rietwijk, zoon van Willem van Velsen, die hem 1½ hoeve land in vrij eigendom in het ambacht Heemskerk heeft opgedragen, met 3 halve hoeven in de nabijheid, en bepaalt de wijze van vererving.

Vgl. de voorafgaande oorkonde nr. KE 125 in het register.

Wi Willaem^a grave van Heynnegouwen^b etc. maken cond etc. dat Jan van Riedwijc Willaems^c sone van Velsen^d ons opghedraghen heeft tenen vrien eyghen anderhalve hoeve lands legghende int ambocht van Eemskerke binnen desen marken: Jans land voirs. up die westside ende Hughe Baken soens land ane die oestzide. Voird versocht hi van ons drie halve hoeve lands die aldus gheleghen sien: van der eerster halve hove soe legghen dese anderhalve hove lands voirscreven op die oistzide ende Aleit^e Symon Monikes^f dochter land op de westside, van der ander halve hoeve zoe es gheleend Bartholmeus^g Hofflands^h sone op die oistzide ende Aleytⁱ van der Beec^j op die westzide, ende van der derder halve hove is naist gheleent Aleyt^k van der Beke op die oistzide ende Voppe Hermans^l sone ane die westzide. Wilc land voirscreven wi verliet hebben ende verlient Janne van Riedwijc voirnoemt van ons te liene te houden in manieren dat nae sire doit comen sal op sinen outsten sone ende van sone te sone, op sine outste dochter liet hi ghiene sone, ende van dochter te dochter, die hi wittelike heeft van Ghetruden^m sinen wive, Reimierⁿ Doeden soens dochter. Wair oec dat sake dat Jan voirs. storve sonder wittachtich kind, soe soude dit land voirscreven comen op Jans outste wittighen broeder jof op sire ouste wittighe suster, warer gheen broder die ghecomen ware van Willaem^o van Velsen^p, ende alsoe voird niet te versterven op dat een witteliker boird van Willaems^q live van Velsen^r ghecomen es. Voird soe bekennen wi Gheertruden, Jans wijf voirscreven, hoir lijftocht van den drien halven hoeven voirscreven.

In^s oirkonde desen brieve bezeght^t met onsen zeghele. Ghegheven in die Haghe des dinxendaghes voir Pinxter int jair ons Heren M^o CCC^o achte ende twintich.