Registers van de Hollandse grafelijkheid 1299-1345

Graaf Willem III verkoopt de buren van Heiloo voor 150 pond Hollands het land dat aangewassen is uit het Bergermeer.

Wi Willaem^a grave etc. maken cond allen luden dat wi bi Willaem^b den Moilnair^c, ter wilen doe hi onse rentemeester was in Kennemairland^d ende in Vriesland^e, vercochten onsen luden den buren van Heylighe loe^f onse land dat gheworpen ende ghegroyet es uyt Berghen meer, wilc land anegaet dat zuytende an Willaem^g Wivene^h soens land dat die Horne hiet, die noirtsyde toit Alkemaireⁱ broec toe, die oist zide an die gheest ende van der gheest streckende in die mere die men Bergher mere hiet, twie hondert roeden an beyden syden ende in midden, ende binnen desen lande zullen si hebben dat bosckelkijn^j dat jeghens dat zuytende leghet ende an die twe hondert roeden strecket, omme anderhalf hondert pond Hollands^k, dair si Heynric heren Dierix sone onsen rentemeester van Kennemairland^l ende van Vriesland^m ghenoch of ghedaen hebben; wilc land voirscreven wi hem gheloven te wairne als men een vri eyghen sculdich es te wairne.

In oirkonde etc. Ghegheven toit sente Gheerdenⁿ berghe des woensdaghes na sente Jacobs dach int jaer ons Heren M CCC neghen ende twintich.