Registers van de Hollandse grafelijkheid 1299-1345

Graaf Willem III verkoopt de circa 3 morgen land buiten de poort van Haarlem, die Machteld, weduwe van Wouter Mensenz., van hem als lijftocht in leen hield, aan dezelfde Machteld en haar huidige echtgenoot Nicolaas Willemsz. van Geervliet in vrij eigendom.

Willaem ..grave van Heynnegouwen^a, van Holland^b ende here van Vriesland^c maken cond allen luden dat wi die drie morghen lands jof dair ommetrend leggende an die porte van Hairlem up die zuytside van den weghe die men vairt te Tetroede^d bi den Zilekijn, binnen desen mercken: op die oystzide die wateringhe die in den Zile gaet, up die westzide tland van onser Vrouwen ghilde van Herlem^e, dat zuytende die Beke tote Harlem^f ende dat nortende die wech van Tetroede^g, die ons ane verstorven ^h van Wouter Meynsenⁱ soens doyt, ende Machtelt, die sijn wijf was, van ons te lijftochte hout, der voirseyder Machtilden^j ende Clays Willems sone van Gheervliet, horen man, vercoft hebben tot enen vryen eyghen omme dortich pond Hollands^k, dair zi Henric heren Dierix sone, onsen rentemeester van Kenemairland^l ende van Vriesland, ghenoch of ghedaen hebben, diere ons goede rekeninghe of doen sal; ende dit land voirscreven gheloven wi hem te waren als men een vry eyghen sculdich es te waren.

Ghegheven in den Haghe des woensdaghes na onser Vrouwen dach in septembre int jair ons Heren M^o CCC^o ses ende dortich^m.