Registers van de Hollandse grafelijkheid 1299-1345

Een aantal met name genoemde edelen stelt zich borg in verband met de door Willem vrouw Baartenz. te betalen huwelijksgave aan zijn dochter Kerstine, haar echtgenoot Filips van Zandhorst, en diens familie, met omschrijving van de voorwaarden van huwelijksgave en borgtocht; graaf Willem III stelt zich overborg, bekrachtigt de overeenkomst en zegelt de oorkonde mee.

Vgl. nr. NH 2.

De onderstaande tekst is gebaseerd op afschrift B.

Wi Diederic here van Wassenare, Kerstans van Raporst, Gheraerd van Raporst, Wouter van Haerlem^c, Jacob van Mordrecht, Jan van Duvenvoerde, Arnoud van Groenevelt ende Dieric^d van Zudeke, ridderen, Jan van Polanen, Jan van Rosenberch, Boudwijn^e van Zueten, Dieric^f van Zueten ende Ysebrand van Rinneghem, knapen, maken cond ende kenlic allen luden dat wi over een ghedraghen sijn ende borghen sijn van aldusghedenighen voerwaerden als hier na ghescreven staen, in dusghedaenre maniere alse dat Willaem ver Barten^g sone gheven sal Philipse van Zanthorst, onsen neve, met Kerstinen sire dochter in witteliken huwelike vier hondert pond Hollands^h, welke IIII^C lb. Hollandsⁱ Willaem voers.ute legghen sal in Philips^j scout voers. ende mire vrouwen van Zanthorst, sire moeder, ende hore kinder te goeder rekeninghe. Voerd waer dat zake dat Willaem^k voers. enich ghelt mere ute leyde dan dese vier hondert lb. in Philips ende mire vrouwen ende hoerre kinder scout voers., jof in anderen zaken daer mens niet omberen en mochte, bi rade heren Gheraerde^l van Raporst ende Jan van Polanen, die soude Philips^m, mijn vrouwe ende hore kindere voerscreven Willaem jof sinen ghewaerden bode jof sinen eerfnamen, waerdⁿ dat sijns ghebrake, vol ende al betalen met samender hand, ende hier voer so heeft Philips van Zanthorst, mier vrouwen van Zanthorst, siere moeder, ende hore kindere voers. bi rade ende bi wille haere meenre vriende in die hant gheset Willame veren Barten sone al haer goed, ist eyghen, ist leen, ist ambocht, ist lijftocht, hoe dat het gheheten es ende waer dat gheleghen es, ute ghenomen hondert pond ghelts jaelix^o die mijn vrouwe van Zanthorst hebben sal horen cost mede te doene met haren kinderen, ende die^p sal si in nemen omtrent den huze te Rodenborch^q alsi alre naeste mach in alsulken renten alst renten mochte over drien jaren voer desen dach. Ende van desen voerscreven goede ende renten sal Willaem voers. an slaen sijn hant jof doen an slaen van sinen weghen, ende in nemen toter wile dat Willaem^r voers. sijn ghelt vol ende al in heeft dat hi ute ghegheven heeft^s boven den vierhondert ponden die hi Philipse van Zanthorst met Kerstinen siere dochter in witteliken huwelike ghegheven heeft; ende alse Willaem dat sine in heeft, so sullen alle dese voerscreven renten ende goed in Philips handen van Zanthorst staen also alsi in Willaems^t handen stonden, toter wile dat hi sijn vierhondert lb. in heeft die hem Willaem^u met Kerstinen sire dochter in huwelike ghegheven heeft. Vord waer dat sake dat Philips storve ende geen kint bi Kerstinen en hadde, so soude Kastine^v ute^w nemen die IIII^C lb. die Willaem^x haer vader haer gaf in huwelike, ende daer mede ute allen goede gaen vrielike behouden hare lijftochte. Vord waer dat sake dat Kerstine storve eer Philips ende ghien kind bi hoer en hadde, so soude Willaem^y voers. jof hoer erfnamen die IIII^C lb. vrielike weder hebben. Voerd waer dat zake dat an desen voerwaerden^z voerghescreven yet ghebrake, so souden wi borghen voerghenoemd, die ons verlien borghen te wesene, met samender hant ende elc voer al in varen legghen tote Haerlaem^a' tote Willaems vermaninghen jof sijns ghewaerds boden jof siere erfnamen, waer dat sijns ghebrake, ende ons selven daer toe winnen ende niet dane te varen eer dese voerscreven voerwaerden vol ghedaen waren; ende elc ridder die mach legghen doen ende leesten met twien goeden knapen, joft hem selven niet ghescien en mochte, die woenachtich sien buten der prochie^b' van Haerlaem^c', ende elc knape met enen goeden knape des ghelike alst voerscreven es van ridders; ende welc hare van ons dese voerwaerde niet en hilde, die verwillecort hem selven trouweloes. Vord so hebben wi ghebeden ende bidden onsen lieven here den grave van Henegouwen^d' ende van Holland^e' dat hi een overborghe wese van allen desen voerwaerden voerscreven, ende gheloven hem met samender hand daer of scadeloes to^f' houden.

Ende wi Willaem^g' grave van Henegouwen^h', van Holland^i' etc., omme bede dese voerghenoemde borghen ende omme dat wi vorderen willen nu ende altoes Philipse van Zanthorst heren Philips sone, daer God die ziele af hebben moete, so love wi alle voerwaerden voerghenoemd vaste ende ghestade te houden jof houden doen als hier voerscreven es, jof twee ridders voer ons te legghen doen ende te leesten alst voerscreven es van den anderen borghen.

Ende omme dat wi borghen voerscreven alle voerscreven saken vaste ende ghestade willen houden sonder verbrec^j' in enighen pointen jof in al, so hebben wi dese lettere bezeghelt met onsen zeghelen, ende hebben ghebeden ende bidden^k' onsen lieven here den grave dicken voernoemd dat hi in kennessen ende omme die meere zekerhede dese lettere met ons wille bezeghelen met sinen zeghele. Ende wi Willaem^l' grave van Henegouwen^m' ende van Holland^n' voers. hebben omme bede der borghen voernoemd ende in kennessen van allen zaken voers. dese lettere bezeghelt met onsen zeghele uyt hanghende. Ghedaen ende ghegheven in den^o' Haghe in Karst daghe int jaer ons Heren M CCC ende zestiene.