Registers van de Hollandse grafelijkheid 1299-1345

Graaf Willem III vergunt heer Gerard van Raaphorst, ridder, dat diens leengoed van 25 morgen land in de Lier en 6 morgen land in Kethel bij diens overlijden zonder wettige zoon in leen zullen worden gehouden door diens dochter Hazekijn, met de bepaling dat de goederen de eerste tien jaar in handen van de executeurs-testamentair zullen blijven om daarmee Gerards testamentaire beschikkingen te betalen.

Wi Willem^a grave etc. maken cont allen luden dat wi heren Gheraerde van Raephorst^b, onsen lieven ende ghetrouwen ridder, alsulke gratie ghedaen hebben ende doen dat waer dat zake dat hi storve sonder wittachtighen zone ghecomen van sinen live, zoe willen wi dat die ^c vive ende twintich morghen lands die hi legghende hevet in die Liere ende die zes morghen lants die hi legghende hevet in den Ketel, wilke XXV morghen lands ende VI vors. hi van ons hout te rechten lene, comen up Hazetiaen siere dochter, ende dese XXV ende VI morghen lands zal Hasetiaen^d vors. van ons ontfaen ende van ons houden te rechten lene ende zal daer of onse man wesen, in aldus ghedaenre maniere dat wi willen dat nae heren Gheraerts^e doit vors. al die orbare ende al die renten van den vorseyden XXV ende zes morghen lands bliven zal vry ende quite tien jare nae heren Gheraerts^f doit vors. in siere testamentoers hande, sijn testament ende sijn besprec^g mede te betailne^h; ende willen dat die testamentoers vornoemt dit vorseyde leen tien jare ghebruken onghemoyet in alsulker manieren als vorscreven es, sonder enigherhande antalen, ende nae dese tien jare zo zal dit vornoemde leen vry comen up Hazetiaen vors. als hier vorscreven es.

In orconde etc. Ghegheven tote Haerlem des donresdaghes nae sente Baven dach int jaer ons Heren M CCC ende XXIIII^o.